Қазақстан полициясы азаматтарды көшеде орналасқан күмәнді QR-кодтарды сканерлеуден сақ болуды ескертті.
Ведомствоның мәліметінше, алаяқтар жалған QR-кодтар арқылы адамдарды қауіпті сайттарға бағыттап, олардың жеке және қаржы деректерін иемденуге әрекет етеді.
Полицияның түсіндіруінше, QR-кодтар бүгінде күнделікті өмірде кеңінен қолданылады. Алайда қылмыскерлер де бұл технологияны пайдаға жаратып жүр.
Мамандардың айтуынша, көшеде, автобус аялдамаларында, тұрғын үй кіреберістерінде немесе жарнама тақтайшаларындағы QR-кодтарды сканерлемес бұрын олардың қауіпсіз екеніне көз жеткізуі керек. Себебі алаяқтар түпнұсқа QR-кодтың үстіне жалған код жапсырып, қолданушыларды қауіпті сайттарға бағыттауы мүмкін.
Мұндай сайттардың мақсаты – азаматтардың жеке мәліметтерін немесе банк карталарының деректерін иемдену Кей жағдайда адам қажетті қызметтің ақысын төлеп жатырмын деп ойлағанымен, қаражат қылмыскерлердің есепшотына түседі.
Күмәнді QR-кодты қалай анықтаймыз?
Полиция мына белгілерді ескеруге кеңес береді:
- QR-код басқа жарнаманың немесе хабарландырудың үстіне жапсырылған;
- хабарландыру ресми рәсімделмеген;
- «Сыйлық алыңыз», «Тек бүгін», «Жедел сканерлеңіз» сияқты асықтыратын мәтіндер қолданылған;
- ұйымның атауы немесе байланыс деректері көрсетілмеген.
Мұндай әрекеттерден қалай қорғануға болады?
Полиция мынадай қауіпсіздік шараларын сақтауды ұсынады:
- белгісіз QR-кодтарды себепсіз сканерлемеу;
- сілтемені ашпас бұрын сайттың мекенжайын мұқият тексеру;
- күмәнді сайттарға жеке деректерді, банк картасының мәліметтерін немесе SMS арқылы келген растау кодтарын енгізбеу;
- белгісіз қосымшаларды жүктемеу және оларға қосымша рұқсат бермеу;
- төлем жасамас бұрын QR-кодтың ресми ұйымға тиесілі екеніне көз жеткізу.
Егер күмәнді QR-кодты сканерлеп, жеке немесе қаржылық деректеріңізді енгізіп қойған болсаңыз, полиция дереу банкке хабарласып, банк картаңызды бұғаттауға кеңес береді.
Полиция азаматтарды қырағы болып, цифрлық қауіпсіздік талаптарын сақтауға шақырды.
