Қарыз алушының өмірін сақтандыру – ауыр сырқат, еңбекке қабілеттіліктен айырылу немесе қарыз алушы қайтыс болған жағдайда оның және отбасының кредит бойынша міндеттемелерін қорғауға арналған ерікті сақтандыру өнімі. Бұл туралы Baribar.kz хабарлап отыр.
Сақтандыру шарты қандай?
Әдетте мұндай сақтандыру қарыз алушының жазатайым оқиға немесе ауру салдарынан қайтыс болуын, І немесе ІІ топтағы мүгедектіктің белгіленуін, сондай-ақ еңбекке қабілеттілігін жоғалту жағдайларын қамтиды.
Сондықтан ипотека рәсімдеу кезінде банктер клиенттерге өмірі мен еңбекке қабілеттілігін сақтандыруды жиі ұсынады.
Сақтандыру қалай істейді?
Қарыз алушы қайтыс болған немесе толық еңбекке қабілетсіз болып қалған жағдайда сақтандыру компаниясы банк алдындағы кредит бойынша қалған берешекті өтейді.
Ал уақытша еңбекке жарамсыздық туындаса, мысалы ауру салдарынан жұмыс істей алмай қалған кезде, сақтандыру компаниясы белгілі бір кезеңде ай сайынғы төлемдерді өз мойнына алуы мүмкін.
Мамандардың айтуынша, мұндай сақтандырудың басты артықшылығы – отбасының қаржылық қауіпсіздігін қамтамасыз ету. Сақтандыру жағдайы орын алғанда төлемдер тұрғын үйді сақтап қалуға және жақындарына қосымша қаржылық ауыртпалық түсуінің алдын алуға мүмкіндік береді.
Шартты мұқият оқу қажет
Сақтандыру шартын рәсімдемес бұрын оның барлық талабын мұқият оқып шығу маңызды. Әсіресе сақтандыру төлемі жүргізілмейтін ерекше жағдайларға назар аудару қажет.
Өйткені кейбір жағдайларда сақтандыру компаниясы төлем жасаудан бас тартуы мүмкін.
Сақтандыру болмаса, не болады?
Егер қарыз алушының өмірін сақтандыру шарты болмаса немесе сақтандыру ұйымы төлем жасаудан бас тартса, ипотекалық міндеттемелер автоматты түрде тоқтатылмайды.
Мұндай жағдайда қарыз мұра құрамына енгізіледі. Ал мұраны қабылдаған мұрагерлер мұраға қалған мүліктің құны шегінде марқұмның борыштары бойынша жауап береді.
Маңызды ақпарат
Қарыз алушының өмірін сақтандыру – ерікті сақтандыру түрі.
«Қазақстан Республикасындағы банктер және банк қызметі туралы» заңға сәйкес банктер клиентті бұл қызметті сатып алуға мәжбүрлей алмайды және оны кредит алудың міндетті шарты ретінде талап етуге құқылы емес.
