Қазақстанда мейрамхана бизнесі қарқынды өсіп келеді. 2026 жылдың I тоқсанында жаңа құрылыс аяқталғаннан кейін 15 мейрамхана пайдалануға берілген. Бұл туралы Baribar.kz хабарлап отыр.
DATA HUB мәліметінше, бұл – кейінгі жеті жылдағы ең жоғары көрсеткіш.
Ұлттық статистика бюросы мәліметтері негізінде жасалған есептеулер бойынша, бұл көрсеткіш 2025 жылдың сәйкес кезеңімен салыстырғанда айтарлықтай артқан.
Жаңа және жаңғыртылған мейрамханалардағы жалпы отыратын орын саны 4,3 мыңға жетіп, бір жыл ішінде екі есеге жуық өскен. Бұл – кейінгі сегіз жылдағы I тоқсан үшін рекордтық деңгей. Дегенмен, статистикаға қайта жаңартылған нысандар да кіретіндіктен, бір мейрамхананың орташа сыйымдылығын нақты есептеу мүмкін емес. 2025 жылы тіркелген жоғары өсімнен кейін де нарықтағы қарқын сақталып отыр: жыл қорытындысында отыратын орындар саны 53% артқан, — делінген хабарламада.
Қай өңірде мейрамхана қымбат?
Жалпы 4,3 мың орынның құны 9,5 млрд теңге болған. Орта есеппен бір орынның құны – 2,2 млн теңге. Ең қымбат орындар Шығыс Қазақстан облысында (шамамен 8 млн теңге) және Түркістан облысында (7,9 млн теңге) тіркелген.
Орын саны бойынша көшбасшы – Жамбыл облысы (1,2 мың). Одан кейін Алматы облысы (1,1 мың) және Атырау облысы (0,7 мың) орналасқан. Республикалық маңызы бар қалалар арасында тек Шымкентте жаңа және жаңартылған мейрамханаларда 0,4 мың орын пайдалануға берілген.
Сонымен қатар елде кафелер саны да өсіп келеді. Қаңтар-наурыз айларында жаңадан салынған 21 кафе пайдалануға беріліп, олардағы орын саны 2,5 мыңға жеткен. Бұл көрсеткіш өткен жылмен салыстырғанда 51% артып, кейінгі 10 жылдағы I тоқсанның рекордын жаңартты, — делінген хабарламада.
