Астанада қар күреу жұмысы үздіксіз жүріп жатыр. Қаланың коммуналдық қызметтері тәулік бойы күшейтілген режимде жұмыс істейді. Күн сайын мыңдаған текше метр қар қала аумағынан шығарылады.
Бұл туралы елорда әкімінің баспасөз қызметі хабарлап отыр.
7 қарашаға қараған түні коммуналдық қызметтер полигондарға 1 073 рейспен 13 310 текше метр қар шығарды.
7 қарашаның таңынан бастап қар күреу жұмысына 2 844 жол жұмысшысы мен 1 337 техника жұмылдырылды.
Қыс маусымы басталғалы бері елордадан 26 мың текше метрден астам қар, яғни 2 122 жүк көлігі көлеміндегі қар шығарылды. Қар күреу жұмысында алдымен қаланың негізгі көшелері мен қоғамдық көлік маршруттары жүретін жолдарға назар аударылады. Осыдан кейін орташа қозғалыс аймақтарында – аулаларда, алаңдарда, тротуарлар мен аялдамаларда тазалау жүргізіледі, — делінген хабарламада.
Астана әкімдігі қала тұрғындары мен қонақтарын қауіпсіздік ережелерін сақтауға, жолдар мен жаяу жүргіншілер жолдарында барынша мұқият болуға, сонымен қатар қолайсыз ауа райы жағдайында алыс сапарларға шықпауға шақырады.
