Черногория Жоғарғы соты «Не Молчи» қоғамдық қорының жетекшісі Динара Смайылованы (Дина Таңсәрі) Қазақстанға экстрадициялаудан түпкілікті түрде бас тартты.
Бұл туралы Динара Смайылова Facebook-парақшасында хабарлап отыр.
4 қыркүйекте Черногория Жоғарғы соты Қазақстан Бас прокуратурасының экстрадициялау туралы өтінішін кері қайтарған. 12 қыркүйекте шешім Черногория Жоғарғы сотында апелляциялық инстанцияда қаралған соң күшіне енді, – деп жазды ол.
Естеріңізге сала кетейік, Қазақстанда Динара Смайылованың үстінен бірнеше қылмыстық іс қозғалып, іздеу жарияланған. Ол Астана сұрауы бойынша Черногорияда ұсталған. Алайда кейін босатылған.
