Қазақстанда бизнеске арналған кредиттерге кепілдік беретін екі қор құрылады. Бұл туралы премьер-министрдің орынбасары – ұлттық экономика министрі Серік Жұманғарин үкіметтің бүгінгі отырысында айтты.
Оның айтуынша, бизнестің несиелеріне кепілдік беру тетігі басқа елдерде өз тиімділігін дәлелдеді. Сондықтан екі кепілдік беру қорын құруға шешім қабылданды. Соның біреуі шағын және орта бизнеске қызмет көрсетеді.
Шағын және орта бизнес үшін кредиттерге кепілдік беру және пайыздық мөлшерлемелерді субсидиялау көлемі ұлғаяды. Биылдың өзінде 1,7 триллион теңгеге 30 мыңға жуық шағын және орта бизнес жобасына қолдау көрсетіледі, — деді Серік Жұманғарин.
Ал екінші қор ірі бизнестің кредиттеріне кепілдік беру үшін құрылады. Ол ірі және стратегиялық маңыз бар жобаларды кепілмен жеткілікті түрде қамтамасыз ету мәселесін шешеді.
