Мәжіліс депутаттары мәдениет заңнамасына енгізілетін өзгерістер аясында фонограммаға қатысты талапты күшейтуге мүдделі.
Депутат Мақсат Толықбаевтың айтуынша, бүгінде концерт ұйымдастырушылары фонограмманың болатынын алдын ала хабарлауға міндетті.
Біз бұл заң жобасына фонограмманы пайдалануға тыйым салуға бағытталған түзетулер енгізуді ұсындық. Бірақ министрлік оны қолдап отырған жоқ, — деді Толықбаев мәжілістің жалпы отырысында.
Министрлік өңірлерде техникалық құралдар 70 процентке тозған дейді. Сосын жанды дауысты жүргізе алатын дыбыс режиссерлері тапшы. Сол себепті фонограммаға толығымен тыйым салу мүмкін емес.
Депутаттың айтуынша, адам фонограмманы көліктен де, үйден де тыңдай алады. Ал концерт үшін ақша төлеп, фонограмманы тыңдаған дұрыс емес.
Мәдениет және ақпарат вице-министрі Айбек Сыдықов 11 наурызда фонограммаға қатысты ұсыныстар кеңінен қаралатынын айтты. Осы отырысқа шоу-бизнес пен мәдениет өкілдері де шақырылады. Осылайша, екінші оқылымға дейін барлығы бір шешімге келуі керек. Ал фонограмма туралы хабарлау ережемен емес, заң арқылы бекітіледі.
Бізде заңға тәуелді актіде фонограмма туралы алдын ала ескерту ережесі бар. Бірақ ол жұмыс істемей отыр. Оны бәріміз көріп отырмыз. Сондықтан депутататтар осы норманы заңнамалық акті ретінде ұсынып отыр. Біз оны қолдаймыз. Егер ол заңға енгізілетін болса, онда жұмыс істейді. Осы жағынан депутаттардың ұсынысын қолдаймыз, — деп түйіндеді Айбек Сыдықов.
