Бүгін, 26 шілдеде Париж Олимпиадасы Қазақстан уақыты бойынша 22:30-да басталады. Париж олимпиадасы 26 шілде – 11 тамыз арасында өтеді. Қазақстанның 80 спортшысы 25 спорт түрінен жүлдеге таласады.
Қазақстанның жалпы Олимпиададағы жолын қаншалық жақсы білесіз? Тестіден өтіп, тексеріп көріңіз.
Қай спортшы допиң дауына ілігіп, медальдан айырып қалған?
Илья Ильин екі рет Олимпиада чемпионы болған. Содан кейін допиң дауы шығып, екі атағынан да айырылып қалған. Зүлфия Чиншанло да допиң дауынан кейін жүлдесінен айырылған. Жалпы, Қазақстанда бес спортшыға допиң қолданды деген айып тағылып, медальдан айырылған. Олар: Илья Ильин, Зүлфия Чиншанло, Мая Манеза, Светлана Подобедова және Нижат Рахимов.
Сидней Олимпиадасының ашылу салтанатында Қазақстан туын қай спортшы ұстап шықты?
Сидней Олимпиадасы 2000 жылы өткен. Олимпиаданың ашылу салтанатында Қазақстан туын боксшы Ермахан Ыбырайымов ұстап шықты. Ол Атланта Олимпиадасында да туды ұстап шыққан еді. Ал Бақыт Ахметов Бейжің Олимпиадасында, Асхат Жіткеев Афина Олимпиадасында туды ұстаған. Биыл ашылу салтанатында туды боксшы Асланбек Шымбергенов ұстап шығады.
Қазақстан қай Олимпиадаға ең көп спортшы апарған?
Қазақстан ең көп спортшы апарған Олимпиада – Бейжің Олимпиадасы. 2008 жылы төртжылдықтың бас додасына 132 спортшы барған. Ал 2020 жылы өткен Токио Олимпиадасына 97 спортшы барса, 2012 жылы өткен Лондон Олимпиадасына 114 спортшы барған.
Олимпиаданың бірінші күні алтын медаль алған Қазақстан спортшысы кім?
Лондон Олимпиадасы 2012 жылы өткен. Велошабандоз Александр Винокуров жарыстың бірінші күнінде алтын медаль алды. Галбадрах Отгонцецег пен Нұрбақыт Теңізбаев Олимпиада ойындарында алтын медальға ие болмаған. Нұрбақыт Теңізбаев Бейжің Олимпиадасында күміс жүлде, Галбадрах Отгонцецег Рио Олимпиадасында қола жүлде алған.
Қазақстан жазғы Олимпиада ойындарында қай спорт түрінен ең көп жүлде жеңген?
Қазақстан жазғы Олимпиада ойындарында бокстан ең көп жүлде жеңген. Бокс – 7 алтын, 7 күміс, 10 қола. Жеңіл атлетика – 2 алтын, 1 күміс, 2 қола. Грек-рим күресі – 1 алтын, 2 күміс, 2 қола.
Атланта Олимпиадасында Қазақстан үшін алғашқы алтынды қай спортшы алған?
Атланта Олимпиадасы 1996 жылы өткен. Алғашқы алтынды Юрий Мельниченко алып, грек-рим күресінен чемпион болды. Сол Олимпиадада боксшы Болат Жұмаділов күміс медальға ие болып, Ермахан Ибрайымов қола медальды қанағат тұтты.
Биыл Олимпиада ойындары қай елде өтеді?
Биыл Олимпиада ойындары Францияда өтеді. Парижде өтетін ХХХІІІ жазғы Олимпиада ойындарының ашылу салтанаты 26 шілде күні сағат 22:30-да Qazaqstan және Qazsport телеарналарынан тікелей эфирде көрсетіледі. Биыл ел намысын спорттың 25 түрінен 80 спортшы қорғайды.
Қазақстан тарихында тұңғыш рет жүзуден Олимпиада чемпионы болған кім?
Қазақстан тарихында тұңғыш рет жүзуден Олимпиада чемпионы – Дмитрий Баландин. Баландин 2:07.46 уақыт нәтижесімен финалда сенсация жасап, Қазақстан тарихында жүзу спортынан тұңғыш рет Олимпиада чемпионы болды.
Қазақстан тәуелсіз ел ретінде жазғы Олимпиада ойындарына қай жылдан бері қатысып келеді?
Қазақстан тәуелсіз ел ретінде жазғы Олимпиада ойындарына 1996 жылдан бері қатысып келеді. 1996 жылы өткен Атланта Олимпиадасында Қазақстан құрамасы 3 алтын, 4 күміс, 4 қола жеңіп алған.
Қазақстан жазғы Олимпиада ойындарында жалпы есепте қанша медаль алған?
Қазақстан жазғы Олимпиада ойындарында тәуелсіздік алғалы жалпы 72 медаль (15 алтын, 21 күміс, 36 қола) жеңіп алды.
Әлеуметтік желіде бөлісу:
