Алматы облысының тауларында қар көшкіні жүрді. Бұл туралы төтенше жағдайлар министрлігі хабарлады.
Тексеру жүргізу кезінде «Қазселденқорғау» мамандары Алматы облысы «Түрген – Батан» ауылы автожолының 23,4 шақырымында қар көшкіні болғанын анықтады. Өздігінен қар көшкінінің көлемі – 187,5 м3.
Қар көшкінінің түсу себебі – температураның жоғарылауы және таулардың баурайындағы қар жамылғысының едәуір қоры. Зардап шеккендер мен қиратулар жоқ. Қар көшкіні Түрген-Батан автожолын жауып тастады.
Автожолды тазалау жұмыстарын ЖАО жүргізіп жатыр. Алматы облысының тауларында көшкін қауіпті. Алдағы күндері тауға барудан бас тартуды ұсынамыз, — делінген хабарламада.
Еске салайық, бұған дейін Кіші және Үлкен Алматы өзендерінде қар көшкіні жүруі мүмкін екенін жазған болатынбыз.
