Қазақстанда 2023 жылдың қорытындысы бойынша жемқорлардан тәркіленген қаржыға салынған 43 мектеп ашылды. Бұл туралы оқу-ағарту министрлігі хабарлады.
Осылайша, елімізде үш апатты және 13 үш ауысымды мектеп мәселесі шешілді. Өңірлерде жаңа білім беру нысандарын іске қосу нәтижесінде тағы 54,4 мың жаңа оқушы орны пайдалануға берілді. Атап айтсақ, Алматы және Түркістан облыстарында – сегіз мектептен, ал елордада – 10 мектеп, — делінген хабарламада.
«Білім беру инфрақұрылымын қолдау қоры» есебінен барлығы 76 738 оқушыға арналған 62 мектептің құрылысы қаржыландырылды. Жобалардың жалпы сомасы 96 миллиард теңгеден асады. Қаражат жергілікті атқарушы органдардың шотына түскен.
Министрлік қордың қызмет ету мерзімі ішінде 150 миллиард теңгеден астам қаражат түскенін атап өтті. Олар мектептерді, қосымша ғимараттар мен интернаттарды қайта жаңартуға, сонымен қатар үш ауысымды оқыту, апатты мектептер мәселесін шешуге және оқушы орындарының тапшылығын жоюға жұмсалды.
