Ресей үкіметінің төрағасы Михаил Мишустин Астанада өтетін халықаралық өнеркәсіптік көрмесіне қатысады. Бұл туралы сыртқы істер министрлігінің ресми өкілі Айбек Смадияров мәлімдеді.
Айбек Смадияровтың айтуынша, биыл 25-27 қыркүйек аралығында Астанада «ЭКСПО» көрме орталығының аумағында «Иннопром. Қазақстан – 2023» халықаралық өнеркәсіптік көрмесі өтеді.
Көрменің мақсаты – өнеркәсіптік кооперацияны дамыту, инвестиция тарту, сауда ынтымақтастығын кеңейту және жаһандық тәжірибе алмасу. Іс-шараға жоғары қонақ ретінде Ресей үкіметінің төрағасы Михаил Мишустин мен Беларусь премьер-министрі Роман Головченконың қатысуы жоспарланып жатыр, — деді Айбек Смадияров брифиңде.
Көрмеде Қазақстан мен Ресейдің негізгі өнеркәсіптік компаниялары, сонымен қатар Армения, Беларусь, ЕАЭО, Пәкістан, Түркия, Үндістан, Иран, Әзербайжан және басқа да елдердің жекелеген компанияларының экспозициялары ұсынылады.