Қазақ-қырғыз шекарасындағы кептеліске жазғы кезеңде жеміс-көкөніс өнімдерін тасымалдау көлемінің ұлғаюы және жолаушылар ағынының өсуі себеп болды.
Бұл туралы Қазақстанның қаржы министрлігі хабарлады.
19-20 тамыз аралығында Қырғызстан тарапынан шекараны кесіп өтетін жүк көліктері жиналып қалды. Оған жазғы кезеңде жеміс-көкөніс өнімдерін тасымалдау көлемінің ұлғаюы және жолаушылар ағынының өсуі себеп болды, — делінген хабарламада.
Министрліктің мәліметінше, шекарашылар өткізу пункттерінде заңсыз әрекеттерге қарсы іс-шаралар кешенін іске асырып жатыр. Қазіргі уақытта өткізу пункттері штаттық режимде жұмыс істеп тұр, орташа тәулігіне шекараны 350-400 жүк автомашинасы кесіп өтеді.
Сонымен қатар елдердің фискалдық органдары көлеңкелі тауар айналымына қарсы іс-қимыл бойынша жұмыс жүргізіліп жатыр.
2022 жылғы ақпанда Қырғыз экспорттаушылары үшін электронды шот-фактураларды міндетті ресімдеу шарасы енгізілді. 2023 жылғы 1 сәуірден бастап тауарларға электронды ілеспе жүкқұжаттарды міндетті ресімдеу енгізілді. Сонымен қатар 2023 жылғы 16 тамыздан бастап Дүниежүзілік сауда ұйымының алып қою тізбесінен тауарларды қадағалау паспортын (төмендетілген кедендік баж) қолдану бойынша техникалық эксперимент іске қосылды, — дейді мамандар.
Еуразиялық экономикалық одақта (ЕАЭО) тасымалдауды қадағалау үшін навигациялық пломбаларды қолдану туралы келісімді іске асыру шеңберінде, сонымен қатар көлік құралдарын кедергісіз өткізу мақсатында 2023 жылғы 30 мамырдан 20 тамызға дейін үш ел (Қазақстан, Қырғызстан және Ресей) навигациялық пломбаларды қолдану бойынша эксперимент жүргізді.
Эксперимент нәтижелерін зерделеу қорытындысы бойынша навигациялық пломбаларды қолдануды тұрақты негізде жүзеге асыру жоспарланып жатыр.
