«Салауатты тамақтану мектебі» бағдарламасы аясында Алматы мен Астананың 17 мектебінде оқушылар мұғалімдерімен және ата-анасымен бірге ағаш отырғызады. Алғашқы 50 түп ағашты Алматыда №27 мектеп гимназиясының ауласына бастауыш класс оқушылары екті.
Бағдарлама аясында оқушылар жалпы 600 түп ағаш отырғызады. Енді қалған 550 көшет Астана мен Алматының мектептеріне жеткізіледі.
Жәния, Ангелина және Амаль — 4-класс оқушылары. Үшеуі бірге екі ағаш отырғызыпты. Көп жұмысты Амальдың істеп жатқанын көрдік.
Ағаштардың атауын ұмытып қалдым, бірақ мынау — егіп жатқан екінші ағашымыз. Өзімді саяжайда жұмыс істеп жатқандай сезінем. Ағаштарға әрі қарай да күтім жасайтын шығармыз. Енді мына еккен ағаштар бізге оттек береді, — дейді Амаль.
Гимназияның директоры Айна Әбдиеваның айтуынша, мектеп – «Салауатты тамақтану мектебі» бағдарламасының ең белсенді қатысушыларының бірі.
Былтыр біз «Өз бағыңды өсір» деген жаңа байқауға қатысқанымызға қуандық. Осы тамаша байқаудың арқасында оқушылар қағазды ұқыпты пайдаланудың маңызын және оны қайта өңдеу қажеттігін білді. Бастысы, балалар туған өлкенің табиғи байлығын сақтауда өзінің үлесі қандай екенін түсінді, — деді Айна Әбдиева.
«Нестле» компаниясының корпоративтік жобалар және орнықты даму басқармасының басшысы Светлана Смолина бұл бағдарлама «Дені сау балалар» жаһандық бастамасының бір бөлігі екенін айтты.
Бастаманың мақсаты – 50 миллионнан астам отбасына дені сау және бақытты балаларды тәрбиелеуге көмектесу. Бұл үшін компания бүкіл әлем бойынша салауатты өмір салтын ілгерілету машығы мен әдетін қалыптастыруға бағытталған білім беру жобаларын іске асырып жатыр.
«Салауатты тамақтану мектебі» білім беру бағдарламасы 2013 жылдан бастап іске асырылып келеді. Жақында бағдарламаға балаларды табиғатқа ұқыпты қарауға үйретуге бағытталған экологиялық модуль енгізілді.
Былтыр экомодуль аясында «Өз бағыңды өсір» байқауы ұйымдастырылған. Мұғалімдер оқушылармен бірге макулатура жинап, оны қайта өңдеу пункттеріне тапсырған еді. Қатысушылар тапсырылған шикізат туралы ақпаратты байқаудың цифрлық платформасына жариялады. Әр 30 келі макулатура сайтта «цифрлық ағаштарға» айналды. Осылайша 600 ағаш құтқарылды.
