Мемлекет басшысы үкімет пен парламенттің алдағы бес жылдағы негізгі міндетін атады.
Президент жаңадан сайланған мәжілістің алдында сөйлеген сөзінде айрықша маңызды міндеттер тұрғанын айтып өті. Қазақстанда жан-жақты жаңғырту жұмысын күшейту керек.
Әлеуметтік-экономикалық даму барысына тың серпін беруіміз керек. Еліміз ұзақ уақыт бойы қолайлы сыртқы ахуалға арқа сүйеп келді. Неше түрлі тұжырымдамаларға, бағдарламаларға сенді. Атқарылған жұмыс туралы жалған есепке сенуге мәжбүр болды. Бірақ аса маңызды, өзекті мәселелер назардан тыс қалды. Халықтың тұрмыс сапасы әлі күнге дейін жақсы емес. Құқықтық әділетсіздік белең алды. Бай мен кедейдің арасы алшақтай түсті. Алдағы бес жылда үкімет және парламент осы негізгі мәселелердің шешімін табуы қажет, — деді президент.
Оның айтуынша, еліміздің белдеуін бекемдеп тартуымыз керек.
Экономикада және әлеуметтік салада жылдар бойы жиналып қалған түйткілдер бар. Оның барлығын ретке келтіруіміз қажет. Сол үшін жұрттың бәріне бірдей жаға бермейтін, бірақ тиімді әрі қажетті шешімдер қабылдау керек болады, — деді мемлекет басшысы.
