Алматы тұрғындары Украинаны қолдауға «Сарыарқа» кинотеатрының артындағы скверде жиналды. Митингіні өткізуге Алматы әкімдігі рұқсат берген.
Ұйымдастырушылар әуеліде митингіні Уәлиханов алаңында өткізуге өтініш берген, бірақ әкімдік онда «жол жөндеу жұмыстары жүргізіліп жатқанын» айтып, Әуезов ауданындағы «Сарыарқа» кинотеатры артындағы скверді ұсынған.
Митинг екі сағатқа жуық болды, алаңға жиналғандар әуелі Қазақстанның, содан кейін Украинаның гимнін айтты.
Осыдан кейін жұрт соғыс құрбандарын бір минут үнсіздікпен еске алды.
Жұрттың қолында Украинаның туы мен «Соғысқа жол жоқ», «Украина жасасын», «Путин сотталсын» деген плакаттар болды.
Белсенділердің кейбірі Қазақстанның Еуразия экономикалық одағынан, ұжымдық қауіпсіздік шарт ұйымынан шығуды талап етті. Олардың айтуынша, Қазақстан халқы бұл ұйымдарға кіруге келісім бермеген, бұрынғы президент Нұрсұлтан Назарбаев бұл жөнінде референдум өткізбеген.
Азаматтық белсенді Әлнұр Ілияшев митингінің ресми бөлімінің қорытындысы бойынша қабылданған қарарды оқып берді. Онда Қазақстан азаматтары Ресейдің Украинаға басқыншылығы мен еліміздің Украинадағы соғысты тоқтату туралы БҰҰ-ның резолюциясына дауыс беруден қалыс қалғанын қатаң айтыптайтыны айтылған.
Қарар Қазақстан президентіне, үкіметіне, парламентіне және Ресейдің, Украинаның, Беларусьтің мемлекетіміздегі елшіліктеріне жіберіледі.
Baribar.kz тілшілері Мейірман Лес пен Бақдәулет Әбдуалы да жиынға қатысты.
