Ақтауда балалар автобусы отқа оранды

Бұл туралы Lada.kz хабарлады.

Оқиға 9 желтоқсанда сағат 17.30 шамасында болған. Облыстық Төтенше жағдайлар департаментінің мәліметінше, сағат 17.43-те өрт толық сөндірілген. Оқиғаның видеосы әлеуметтік желіде тарап кетті.

Оқиға куәгері Русланның айтуынша, Приморский ауданы тұсынан өтіп бара жатқанда түтін шығып жатқан автобусты көріп, бірден соған қарай жүгірген.

Автобусқа қарай жүгіргенімде, капоттың алдыңғы жағы өртеніп жатты. Көлікте балалар болды. Қанша екенін нақты айта алмаймын, бірақ автобустың артында бала толып отырды. Адамдар жүгіріп келіп, балаларды шығаруға көмектесті. Балаларды бір-бірімізге беріп тұрдық. Олар қорқып қалды. Соңғы баланы шығарғанда автобус түгел отқа оранды, — деді төтенше жағдай куәгері Руслан.

Екінші куәгер де өртенген автобуста балалар болғанын айтты.

30-ға жуық бала болды, оларды тез арада басқа автобусқа отырғызып, алып кетті. Содан кейін ата-аналар келіп жылап, айқай-шу басталды. Олар балаларын басқа автобусқа отырғызғанын білмеген шығар, — деді екінші куәгер.

Ақтау әкімдігі өртенген автобуста жолаушылардың қаза тапқаны туралы ақпараттың жалған екенін хабарлады.

ПАЗ-320530 маркалы жолаушы автобусы жол бойында толық жанып кетті, өртсөндірушілер келген кезде автобуста жолаушылар болған жоқ. Зардап шеккендер жоқ. Өрт 17:43-те сөндірілді.Оның себебі анықталып жатыр, — делінген хабарламада.