Бұл туралы Otyrar.kz хабарлады.
П.Қырықбаев, М.Пернебаева, Б.Оспанова және Г.Әшірбекова қылмыстық топ құрып, оған басшылық жасады, қызмет бабын пайдалана отырып аса ірі мөлшерде ақша жымқырды деп айыпталды (Қылмыстық кодекстің 262-бабы 3-бөлігі, 189-бабы 4-бөлігінің 1 және 2 тармақшалары).
Оқиға 2019 жылы басталған. Ол кезде бекітілген жоспарға сәйкес Дене шынықтыру және спорт басқармасы жарыстар мен оқу-жаттығу жиындары түрінде түрлі спорттық іс-шараны өткізіп жүрген.
Басқарма басшысы П.Қырықбаев спорттық іс-шараларды жүзеге асыру, және олардың қатысушыларын қаржыландыру туралы бірқатар бұйрық шығарған. Алайда бөлінген қаражатқа спорттық іс-шаралар өткізілмей немесе ішінара өткізіліп, қаражат толық игерілді деп есеп берілген.
Аға жаттықтырушы ақшаны шығарғаннан кейін бір бөлігін әкімдік қызметкерлеріне беріп отырған. Ақшаның қалған бөлігіне жаттықтырушылар спорттық іс-шаралар өткізген немесе өзіне қалдырған. Осылайша, мемлекетке шамамен 70 миллион теңге көлемінде залал келтірілді, — делінген материалда.
Қырықбаевқа сот үкімімен 2 жылға бас бостандығын шектеу, оның әріптесі Оспановаға 6 айға бас бостандығын шектеу жазасы тағайындалды.
Сот үкімімен М.Пернебаев пен Г.Әшірбекова аса ірі көлемде ақша ұрлағаны үшін кінәлі деп танылып, әрқайсысы 7 жылға сотталды.
