Ақорданың баспасөз қызметінің хабарлауынша, бас мүфти мемлекет басшысына діни басқармасының пандемия кезінде жасаған қайырымдылық шаралары жайында мәлімет берді.
Наурызбай қажы Тағанұлының айтуынша, коронавирус кезінде мүфтият тарапынан ауруханаларға жасанды тынысалу, оттегі аппараттары мен медицина құрал-жабдықтары, мұқтаж жандарға дәрі-дәрмектер, мешіттер жанындағы тігін цехтарында тігілген маскалар мен қорғаныс киімдерін тегін таратты.
Сонымен бірге «Ел үлесі — пәтерде» акциясы аясында 314 баспана берілгенін айтты. Бұған қоса, имамдардың білімін көтеру, кадр даярлау мәселелері жайында баяндады.
Наурызбай қажы Тағанұлы Қасым-Жомарт Тоқаевқа мүфтият алдағы уақытта «Ихсан» ілімін, Абайдың кемел адам концепциясын кеңінен дәріптеп, насихаттау жұмыстарымен айналысатынын жеткізді.
Кездесу барысында Қазақстан мұсылмандары діни басқармасының алдағы жоспарлары туралы да сөз болды. Атап айтқанда, Ислам академиясын құру, Ислам және теология кітапханасын салу, еліміздегі мешіттердің архитектурасын қазақы салт-санаға сай қалыптастыру мәселелері айтылды.
Кездесу соңында президент Қасым-Жомарт Тоқаев Қазақстан мұсылмандары діни басқармасының жұмысын жоғары бағалап, алдағы бастамаларына сәттілік тіледі.
