Ақорданың баспасөз қызметінің хабарлауынша, шағынаудандағы тұрғын үй қоры — 787,7 мың шаршы метр. Физика-математика пәндерін тереңдетіп оқитын 720 оқушыға арналған Назарбаев зияткерлік мектебінің құрылысы аяқталған. Жанында 120 орындық жатақханасы бар. Сонымен қатар мемлекеттік-жекеменшік әріптестік аясында 320 орындық балабақша салынған. Жуырда Қарағайлы шағынауданында 1 405 пәтерлік 20 тұрғын үй пайдалануға берілген.
Сонымен бірге Қарағайлыда 3 мектеп, 6 балабақша, мұз модулі және оңалту орталығы салынады.
Кейінгі екі жылда 200-ден астам мұқтаж отбасыға Қарағайлы шағыеауданынан пәтер берілген. Президент көпбалалы аналармен кездесіп, мемлекет әлеуметтік қолдауды жалғастыра беретінін айтты.
Үкімет көпбалалы аналарға, мұқтаж отбасыларға ұдайы көмек беріп келеді. Әртүрлі жеңілдіктер қарастырып отыр. Ең бастысы, өздеріңіздей көпбалалы аналардың еңбекке ерекше деген талпынысы қуантады. Бала тәрбиесімен айналысып қана қоймай, халықты жұмыспен қамтып отырған игі істеріңіз өзгелерге үлгі болуы керек. Сондықтан сіздерді әрдайым қолдай береміз, — деді Қасым-Жомарт Тоқаев.
Көпбалалы аналар отбасы бизнесін дамытуға берілетін гранттардың тізімін кеңейту, грант сомасын ұлғайту жөніндегі ұсыныс айтты.
Президент Қарағайлы шағынауданындағы бірегей спорт кешенін аралап көрді. Оның айтуынша, мұндай нысан Қазақстанның әр қаласында салынуы қажет.
