Тұңғыш Президентіміз — Елбасы Нұрсұлтан Назарбаевтың қолдауымен басталған ірі стратегиялық маңызы бар — «Бейнеу — Бозой-Шымкент» магистрал газ құбыры біздің өңірімізге сәтті қадам, зор мүмкіндік әкелді. Облыс аумағынан өтетін газ құбыры Сыр өңірін газдандыруға жол ашты. Қазіргі таңда ауданда 6 500-ге жуық тұрғын үй көгілдір отынмен қамтамасыз етілген. 200-ден астам кәсіпкерлік және әлеуметтік-мәдени нысандар газға қосылған. Бүгін, міне, Аралдан кейін Жақсықылыш кентіне көгілдір отын жеткізіліп отыр. Осы жұмыстардың барысында Жақсықылыш кентіндегі жалпы саны 855 жеке тұрғын үй, 23 кәсіпкерлік нысан және 4 әлеуметтік нысан көгілдір отынға қосылады. Бүгінгі коронавирус індетіне қарамастан қол жеткізіп отырған көгілдір отын әрбір отбасының жылуын, Отанымыздың қуатын арттыра түседі деп сенемін! Жақсықылыш кентіне газ берілсін! — деді облыс әкімі Гүлшара Әбдіқалықова.
Еске салайық, 2015 жылы Қызылорда облысы әкімдігі мен «ҚазТрансГаз Аймақ» АҚ арасындағы меморандумға сәйкес Аралдың 288 шақырымына газ құбыры және екі газ тарату пункті мен 36 шкаф газ тарату пунктерінің құрылысы жүргізілген. Арал бойынша жалпы 6321 тұрғын үй, 210 кәсіпкерлік және 18 әлеуметтік-мәдени нысан газ жүйесіне қосылған.
2019 жылы Қызылорда облысының энергетика және тұрғын үй-коммуналдық шаруашылық басқармасының тапсырысымен, Жақсықылыш кентін «Компания Газ Строй» ЖШС-гі мердігер мекемесі арқылы газдандыру басталып, қазіргі уақытта толықтай орындалған. Осы газдандыру жұмысы барысында кентке 57,7 шақырым газ құбыры, бір газ тарату пункті және 4 шкаф газ тарату пунктері орнатылған.
Телекөпірге Жақсықылыш кентінен Арал ауданының әкімі Мұхтар Оразбаев, облыстық энергетика және тұрғын үй-коммуналдық шаруашылық басқармасы басшысының міндетін атқарушы Ерлан Жоламанов, «Аралтұз» АҚ директоры Бауыржан Көшімбаев және «ҚазТрансГаз Аймақ» АҚ Қызылорда өндірістік филиалының
қызметкерлері қатысты.
Шара соңында Жақсықылыш кентінің еңбек ардагері Айтуған Исмағұлов атқарылып жатқан жұмыстарға тұрғындардың атынан алғыс айтып, батасын берді.