Алматыда Орталық Азия жастарының Central Asia Youth Festival атты тұңғыш фестивалі өтіп жатыр. Фестивальді ҚР Тұңғыш Президенті — Елбасы қорының атқарушы директоры Әсет Исекешев, Алматы әкімі Бақытжан Сағынтаев пен Ақпарат және қоғамдық даму вице-министрі Марат Әзілханов құттықтау сөздерімен ашты.
Бүгінде адами капитал — ұлт жетістігінің басты факторы. Фестиваль сіздерді шабыттандырып, бағыт беретін, әрқайсыңызды бейбітшілік пен келісімнің амбассадоры ететін алғашқы қарлығаш екеніне сенемін. Бұл — алғашқы қадам ғана, ал болашақта бізді ұзақ және барынша нәтижелі жол күтіп тұр. Ақ жол, достарым менің! — деді ҚР Тұңғыш Президенті — Елбасы қорының атқарушы директоры Әсет Исекешев.
Қала әкімі Бақытжан Сағынтаев келер жылы Алматыда Орталық Азия волонтерлары мен волонтерлар ұйымдарының Жастар форумын өткізуді ұсынды. Ол мемлекеттің дамуындағы жастардың ролі ерекше ролі екенін және ел Президент Қасым-Жомарт Тоқаевтың 2020 жылды Волонтерлар жылы деп жариялауы жастар арасындағы ынтымақтастықты нығайтуға оң ықпал ететінін айтты.
Жастардың тікелей араласуы — стратегиялық серіктестікті, достық пен тату көрші болуды нығайтудың басты шарты. Сондықтан Қазақстанның Тұңғыш Президентінің қорына, ББҰ өкілдігіне, өзге де ынталы ұйымдар мен қонақтарға — жалпы барлығыңызға 2020 жылы Алматыда Орталық Азияның волонтерлары мен волонтерлар ұйымдарының Жастар форумын өткізу мүмкіндігін қарастыруды ұсынамын, — деді Бақытжан Сағынтаев.
ҚР Тұңғыш Президенті — Елбасы қоры мен Алматы әкімдігі өткізіп отырған бұл фестиваль Қазақстандағы Жастар жылына арналған. Шараның серіктестері — БҰҰ, ЕҚЫҰ және Конрад Аденауэр қоры.
Фестивальге Қазақстаннан, Қырғызстаннан, Өзбекстаннан және Әзірбайжаннан 300-ден астам қонақ қатысып жатыр. Олар — халықаралық ұйым мүшелері, белсенді жастар, сарапшылар, қоғам, мәдениет және ғылым қайраткерлері, стартап-кәсіпкерлер мен спортшылар.
Фестиваль сессиялары жұмысында IT, киберқауіпсіздік, көші-қон, зияткерлік капиталды сақтау, салауатты өмір салтын қалыптастыру, білім алу, көпұлтты қоғам — бейбітшілік пен келісім моделіне ерекше назар аударылады.
