Павлодар облысына жұмыс сапары барысында Қасым-Жомарт Тоқаев өңір жұртшылығымен кездесті.
Ақорданың баспасөз қызметінің хабарлауынша, Қасым-Жомарт Тоқаев сөз басында Павлодар облысы еліміздің дамуына зор үлес қосып отырған ірі өндіріс өңірлерінің бірі екенін атап өтті.
Тәуелсіздік жылдары Ертіс өңірінің экономикалық әлеуеті едәуір нығайды. Облыстарыңыз Қазақстанның өнеркәсіптік және энергетикалық флагмандарының біріне айналды. Елбасы ұсынған индустрияландыру бағдарламасының арқасында өңірде құны 988 миллиард теңге болатын 90 жоба жүзеге асырылды. Бұл жобалар жанармай-энергетика кешенін, мұнай-химия, металлургия және басқа да салаларды қамтиды, — Қазақстан Президенті.
Қасым-Жомарт Тоқаев облыс басшыларының назарын халықтың әл-ауқатын арттыруға байланысты мәселелерге аударды.
Павлодар облысы — ауылдарды ауызсумен қамтамасыз ету жөнінен еліміз бойынша көрсеткіші ең төмен өңірлердің бірі. Бұл мәселені жүйелі түрде жедел шешу керек. «Өңірлерді дамытудың 2020 жылға дейінгі» бағдарламасы аясында 2018 жылы сумен жабдықтау және су тарту жүйелерін жаңғырту үшін республикалық бюджеттен 2,7 миллиард теңге қаржы бөлінді. Үкімет пен әкімге әрбір бөлінген теңгеге қатаң бақылау жасауды тапсырамын. Сонда ғана халықты сумен қамтамасыз ету ісін уақытылы және тиімді шеше аламыз, — деді Мемлекет басшысы.
Президент аталған өңір үшін экология мәселесі өзекті күйінде қалып отырғанын айтты.
Біз ұлт денсаулығына, саламатты өмір салтын насихаттауға ерекше назар аударамыз. Алайда кәсіпорындардың қалдықтарына бақылаудың жоқтығынан біздің өндіріс орталықтарымызда күрделі экологиялық ахуал қалыптасып отыр, — деді Қазақстан басшысы.
Президент облыс әкіміне Үкіметпен бірлесіп, Жастар жылы аясындағы жол картасында қарастырылған шараларды жүзеге асыруды тапсырды.
Бізге жұмыспен қамту саласындағы іс-қимылдарды жандандыру керек. Сонымен бірге жұмыс күші көп аймақтардан көшіп келетін халықты қолдау шараларын күшейтуіміз қажет. Бүгінде облыстың жыл сайынғы жұмыс күшіне деген қажеттілігі 25 мыңнан астам адамға жетті. Мұны шешудің жолы — қолайлы инфрақұрылымдар, қолжетімді және жалға берілетін баспаналар құрылысы, — деді Қасым-Жомарт Тоқаев.
Мемлекет басшысы өңірлерді дамыту және халықтың әл-ауқатын арттыру әрдайым ерекше бақылауда болатынын айтты.
