Жер сатуға бұқара жаппай наразылық білдіріп жатса, министрлік баяғыда ол жердің бағасын бекітіп қойыпты. Кувейттей мемлекет аумағы сиятын қазақ жері нәрі мен құнарына қарай саудаланады екен.
Самат Сәрсенов, ҚР Ұлттық экономика министрлігі басқарма басшысы:
— Кей жайылым жерлер 2-4 мың теңге тұруы мүмкін гектары. Ең бағалы жерлер суармалы 125 мың теңгеге дейін барады гектары. Бұл жер түріне байланысты.
1 гектары 1 қорап памперстің құнынан да арзанға кеткелі жатса да, «Жерді қымбатқа сатып жатқан жоқпыз» деген министрлік қарапайым шаруаның да жерге қолы жететінін айтады. Алайда әр адамның ең азы қанша жер алуға құқысы бар екенін үкімет деңгейінде емес, сол баяғы шенділер, әкімдер шешеді екен. Ал араны кең олигархтардың өрісі одан сайын кеңи түспейді ме дегенге министрлік жұбату айтқандай болды.
Самат Сәрсенов, ҚР Ұлттық экономика министрлігі басқарма басшысы:
— Бір бай адамдарға осы ауылшаруашылық жерлер өтіп кетіп, бір қолға шоғырлануы мүмкін бе? Мүмкін емес, себебі шектеу бар. Мысалы кей аудандарда суармалы жерлер аз көлемде, шектеу 3-4 га дейін бар. Өндірістік кооперативтерде 50,60,80 мың га дейін бар.
Әрине бұл құжат жүзінде дайындалатын дүние. Шенді-шекпенді жерді барлық туған туыс пен дос жаран атына аударса да сот жоқ, тек жекелеген адамға жазылмауы тиіс. Бірақ бұқара қанша базына айтса да, жер сатылады. Күні кеше министр Досаев 645 мың жер дайын десе, бүгін министрлік 1 млн 400 мыңнан астам жерді сатылымға әзірлеп қойыпты.
Ең көп жер Қостанай облысында сатылады. 300 мың гектар аукционға әзір тұр. Кейін сатылатын аумақтың дені Шығыс Қазақстанда яғни, 225 мыңнан артық болса, Қарағанды облысы да сол шамалас. Ең аз жер Батыс Қазақстанда саудаға түседі. Министрлік сандардың әлі өзгеретінін айтқанымен, жерді алуға өтініш білдіріп жатқандар да бар екен.
АМАНДЫҚ БАТТАЛОВ, Алматы облысының әкімі:
— Алматы облысынан 651 мың жер учаскесі, 94 мың гектардан астам жерді сатылымға әзірлеп қойдық. Аукционға шығару үшін 60 млн теңгедей қаражат жұмсалды. Қазір жер алуға 211 адам өтініш білдірген.
Шекара маңындағы жерлер жеке меншікке өтпейді деген министрлік қазір жерді жалға алып отырған адамдарға «жерді сатып ал» деп ешкім мәжбүрлемейді дейді. Ерік өзінде, бастысы, жеңілдік жетеді деп мақтанды министрлік. Жер бәс саудаға салынса, 50 пайыз жеңілдік, 10 жыл бөліп төлеу тағы бар. Тиынға кететін жер, бастысы шетелдіктерге сатылмайды деп жұбатты билік. Алайда қазір өзге ел азаматтары құрылыс, өзге де мақсаттар үшін 1400-ден астам жер телімін сатып алған.