– Қазақстан құрамасы сапында бұрыннан бері өнер көрсетіп жүрген сақа ойыншылар бар. Солардың қатарын дарынды жастармен толықтыруды жөн көріп отырмыз. Желтоқсан айында олар Польшада өтетін халықаралық турнирге қатысады. Сол бәсекелер барысында қырағы бапкерлердің назарына іліккен ойыншылар үшін өздерінің мықтылығын түбегейлі мойындатуға тамаша мүмкіндік туындайды. Дүбірлі жарыс барысында кімде-кім өрелі өнерімен көзге түссе, солар әлем чемпионатына қатысуы мүмкін үміткерлердің қатарына қосылады, – дейді Андрей Назаров.
Естеріңізге сала кетейік, 2016 жылғы әлем чемпионаты 6-22 мамыр аралығында Ресейдің Мәскеу және Санкт-Петербор қалаларында өтеді. Бұл жарыста 16 команда бақ сынайды. Биыл Польшада ұйымдастырылған іріктеу турнирінен іркілмей өтіп, барлық қарсыластарын бет қаратпай ұтқан Қазақстанның хоккейшілері төрткүл дүниенің мықтылары бас қосқан додада «В» тобында өнер көрсетеді. Қарсыластарымыз – Швеция, Чехия, Швейцария, Латвия, Норвегия, Дания және Ресей құрамалары. Бұл бәсекелер Мәскеудегі ВТБ Мұз сарайында өтеді. Ал «А» тобындағы Канада, Финляндия, АҚШ, Словакия, Беларусь, Франция, Германия және Венгрия командалары Санкт-Петербордағы «Юбилейный» спорт кешенінде күш сынасады.
Әр топта 1-4 орындарды иеленген командалар плей-офф додасына жолдама алады. Яғни жүлделі орындар үшін таласу мүмкіндігіне ие болады. Ал екі топтағы сайыстарда ең нашар нәтиже көрсеткен команда келесі жылы мықтылармен күш сынасу құрметіне ие болады.
