Жазда жұрт ең көп баратын демалыс орындарының бірі – Алакөл. Кейінгі жылдары көл жағалауындағы туристік инфрақұрылым қарқынды дамып, демалатындар саны артқан. Суы шипалы, табиғаты ерекше және ауасы таза Алакөлге шетелден де туристер барады. Осыған орай, Baribar.kz Алакөлде демалудың негізгі артықшылықтарын ұсынып отыр.
Суы шипалы
Алакөлдің басты ерекшелігі – суының емдік қасиеті бар. Көл суының құрамында түрлі минерал мен микроэлемент кездеседі. Сондықтан көптеген демалушы Алакөлге тек тынығу үшін емес, денсаулығын жақсарту үшін де барады. Мамандар судың тері, буын және омыртқа ауруларына, жүйке жүйесінің кейбір сырқатына оң әсері бар екенін айтады. Көлдің тағы бір ерекшелігі – суы тұзды.
Ауасы таза
Көл маңындағы ауа ерекше таза әрі климаты құрғақ. Су айдыны мен дала табиғатының үйлесімі ағзаны сергітеді. Қаладағы қарбалас өмірден шаршаған адамдар табиғат аясында демалып, күш-қуатын қалпына келтіруге мүмкіндік береді. Әсіресе, таза ауасы тыныс алу жүйесіне өте пайдалы.
Табиғаты ерекше
Алакөлдің табиғаты қайталанбас сұлулығымен ерекшеленеді. Көлдің түсі күн шығар сәт пен күн батар кезде және күн райына қарай құбылып отырады. Таңертең және кешке көл жағалауынан ерекше көріністі көруге болады. Бір жағынан Жоңғар Алатауының сілемдері көрінсе, екінші жағынан шексіз дала созылып жатыр. Бұл өңір, әсіресе, табиғат аясында тынығуды жақсы көретіндерге ұнайды.
Емдік балшық
Алакөл маңында кездесетін табиғи қара балшық емдік қасиетімен танымал. Көптеген демалушы оны денесіне жағып, тері күтімі мен сауықтыру үшін қолданады. Балшық құрамындағы табиғи минералдар терінің серпімділігін жақсартуға көмектеседі. Сондықтан жағалауда денесіне балшық жағып жүрген адамдарды көп көруге болады.
Инфрақұрылымы дамып келеді
Кейінгі жылдары Алакөл жағалауында жаңа қонақүйлер, демалыс үйлері, пансионаттар мен ойын-сауық нысандары бой көтерді. Теміржол және әуе қатынасы туристерге қолайлы бола түсті. Бүгінде көл жағалауында әртүрлі деңгейде қызмет көрсететін жүздеген демалыс орны бар.
Су спорты және белсенді демалыс
Алакөл тек тынығып демалатын орын емес, белсенді демалысты ұнататындарға да қолайлы. Жағалаудан гидроцикл, катамаран, қайық және басқа да су көліктерін жалға алуға болады. Кей демалыс орындарында жағажай волейболы, балаларға арналған аттракциондар мен түрлі ойын-сауық бағдарламасы ұйымдастырылады. Бұл туристердің демалысын одан әрі қызық ете түседі.
Отбасымен демалуға ыңғайлы
Алакөл — балалармен бірге демалуға қолайлы орындардың бірі. Демалыс орындарында балалар алаңы, бассейн, аниматорлар мен арнайы ойын бағдарламалары қарастырылған. Су жағасының кей жері таяз болғандықтан, балаға да қауіпсіздеу. Сондықтан бұл бағытты отбасымен демалуға қолайлы болғандықтан да көп таңдайды.
Бағасы қалта көтереді
Алакөлде демалу шетелдегі курорттармен салыстырғанда әлдеқайда тиімді. Мұнда эконом санаттағы қонақүйден бастап, жайлы қонақүй мен демалыс кешеніне дейін түрлі нұсқасы бар. Әр турист демалыс орнын өз бюджетіне қарай таңдай алады. Сондықтан Алакөл халықтың қалтасы көтеретін туристік бағыттардың бірі болып отыр.
Ұялы байланыс пен интернет сапасы жақсарған
Кейінгі жылдары Алакөл жағалауында байланыс сапасы мен интернет желісі айтарлықтай жақсарды. Бұл демалушыларға жақындарымен байланыста болып, жұмысқа қатысты маңызды мәселелерді қашықтан шешуге мүмкіндік береді. Сонымен қатар туристер демалыстан алған әсерін әлеуметтік желіде бөлісіп, көлдің әдемі көрінісін сол сәтте-ақ жариялай алады.
Алакөл – шетелдегі курорттарға балама демалыс орны
Бұл халыққа шетелге шықпай-ақ, сапалы демалуға мүмкіндік береді. Алакөл кейінгі жылдары Қазақстан азаматтарына ғана емес, шетелдегі туристерге де танымал бағытқа айналып келеді. Сондықтан көптеген демалушы Алакөлді шетелдегі курорттарға лайық балама деп біледі.
Алакөлдің артықшылығын мамандар мен туризм саласының өкілдер ғана емес, онда демалып қайтқан туристер де айтып жүр.
Қызылорда облысының тұрғыны, мұғалім Эльмира Жүнісбекова кейінгі бірнеше жылда жазғы демалысын Алакөлде өткізуді әдетке айналдырған. Оның сөзіне қарағанда, көлдегі бірнеше күндік демалыстың өзі адамды сергітеді.
Алғаш рет Алакөлге бірнеше жыл бұрын барған едім. Сол кезден бастап ол жер отбасымыздың сүйікті демалыс орнына айналды. Судың ерекшелігі бірден байқалады. Суға шомылғаннан кейін денең жеңілдеп, ерекше сергектік сезінесің. Табиғаты өте әдемі, ауасы таза. Балаларға да ұнайды. Сондықтан Алакөлге жыл сайын баруға тырысамыз, — дейді ол.
Ал Алматы тұрғыны, көп балалы ана Жайсанкүл Құланбайқызы Алакөлдің туристерге қолайлы болып келе жатқанын айтты.
Алакөл өте жақсы дамып келеді. Қонақүй көбейіп, қызмет көрсету сапасы жақсарған. Демалушыларға қажет жағдайдың бәрі жасалған. Әсіресе, отбасымен демалуға өте ыңғайлы. Балаларға арналған ойын алаңдары, түрлі ойын-сауық бағдарламасы бар, — дейді ол.
Қорытынды
Алакөл — Қазақстандағы ең тартымды туристік бағыттардың бірі. Мұнда демалушылар денсаулығын жақсартып қана қоймай, табиғат аясында тынығып, ұмытылмас әсер ала алады. Ауасы таза, суының емдік қасиеті болғаны, бағасы қалта көтеретіні мен нфрақұрылымы дамығаны жазғы демалысты Алакөлде өткізуге мүмкіндік беріп отыр.
