Париждегі Лувр мұражайында қауіпсіздікке қатысты тағы бір даулы жағдай тіркелді. Бұл туралы BMFTV хабарлап отыр.
Екі бельгиялық блогер — Нил мен Сенн — әлемдегі ең қатаң қорғалатын музейлердің біріне өз портреттерін жасырын түрде орналастырып кеткен.
Блогерлер қарапайым келуші ретінде музейге кіріп, Lego-конструкторынан әзірленген арнайы рамканы қауіпсіздік тексерісінен өткізе алған. Жақтау қажет кезінде жылдам жиналып, қайта бөлшектелетіндіктен, бақылау қызметкерлерінің назарынан тыс қалған.
Леонардо да Винчидің әйгілі «Мона Лизасы» орналасқан Мемлекеттер залында олар өз портреттерін XVI ғасырдағы венециялық шеберлердің картиналары арасына іліп қойған. Әрекеттерін суретке түсіріп алған блогерлер музейден еш кедергісіз шығып кеткен.
Ең таңғаларлығы, қойылған «псевдо-экспонат» келесі күні де қабырғадан алынбай, келушілерге көрсетіле берген.
Еске салайық, 2025 жылғы 19 қазанда бір топ адам Лувр мұражайына кіріп, француз патшайымдарына тиесілі сегіз зергерлік бұйымды ұрлап кеткен еді.
