Түнде Қазақстанның жолдарында діттеген жеріне жете алмай боранда қалған 51 адам құтқарылды. Бұл туралы ТЖМ хабарлап отыр.
Қостанай облысында «Арқалық-Торғай» автожолында қар құрсауында үш жеңіл және бір жүк көлігі тұрып қалған. Жол талғамайтын көлікпен құтқарушылар алты адамды эвакуациялады, — делінген хабарламада.
Сонымен қатар қар құрсауында қалған отбасы құтқарылды. Ерлі-зайыпты екі баласымен боранда қалып қойған. Аман қалғандардың ешқайсысы медициналық көмекке жүгінбеген.
Ұлытау облысында ТЖД қызметкерлері көлікпен жолда қалған төрт адамды құтқарды.
Өткен түнде ең көп құтқару жұмысы Ақтөбе облысында болды. Бірден үш ауданда көліктер қарлы боранда жолда қалған. Атырау облысында қардан бес адам құтқарылды. Олар жеңіл көлікпен діттеген жеріне жете алмаған.
