3 қыркүйекте Алматыдағы Chaplin Mega Alma-Ata кинотеатрында IX Baiqonyr кинофестивалінің салтанатты ашылу рәсімі өтті. Шара режиссер Кенжебек Шайқақовтың «Айқай» фильмінің көрсетілімімен басталды.
Жыл сайын кино саласының үздіктерін жинап, кино әлеміне енді аяқ басқан жас кинематографтарға бастау болатын Baiqonyr кинофестивалі осымен тоғызыншы жыл қатарынан ұйымдастырылып отыр.
Ашылу салтанатында сөз алған Baiqonyr Film Festival президенті Ануар Кенжебаев биылғы фестивальдің бірнеше ерекшелігін атап өтті.
Кинофестиваль тек жас таланттарды көрсетумен шектелмейді. Біз оларды қолдап қана қоймай, сонымен қатар кино саласын дамытып жатырмыз деп ойлаймын. Мұның айқын дәлелі — фестиваль аясында кинотанушылар мен киносыншылардың III халықаралық форумының өткізілуі, — деді Ануар Кенжебаев фестивальмен қатар өтіп жатқан форум туралы.
Бағдарламалық директор Ержан Жұмабеков биыл алғаш рет дебюттік толықметражды фильмдер байқауы өтетінін айтты. Биыл 20 елден келіп түскен 670 өтінімнің ішінен фестивальдің байқау бағдарламасына қатысатын 34 фильм іріктеліп алынды. Байқауға Қазақстан, Грузия, Әзірбайжан, Армения, Өзбекстан, Тәжікстан, Қырғызстан және Ресей елдерінің өкілдері қатысып жатыр.
Биыл біз Baiqonyr кинофестивалі бағдарламасын мақтанышпен ұсынамыз. Бұрынғы фестивальдерде толықметражды фильмдерді бағдарламадан тыс көрсететінбіз, ал биыл байқау аясында көрсетіп жатырмыз. Қысқа метрлі фильмдерден өскен жас режиссерлердің алғашқы фильмдерін көрсететін бірегей платформа фестиваль болады деп ойлаймыз, — деді Ержан Жұмабеков.
Кейін шараға жиналған қонақтар асыға күткен Семей полигонымен тағдырлас әке мен бала өмірін баяндайтын Кенжебек Шайқақовтың «Айқай» фильмінің көрсетілімін тамашалады. Фильм алғаш рет Қазақстанда көрсетіліп отыр, бұған дейін фильмнің премьерасы Пусан халықаралық кинофестивалінде өткен.
IX Baiqonyr кинофестивалі 3-8 қыркүйек аралығында өтеді, байқауға түскен барлық фильм MEGA Alma-Ata сауда орталығындағы Chaplin Cinemas кинотеатрында тегін көрсетіледі. Тек толықметражды фильмдер ақылы негізде көрсетіледі, оған билетті Kino.kz сайтынан, не қосымшасынан сатып алуға болады.
Сонымен қатар, III Халықаралық кинотанушылар мен киносыншылар форумы аясында түрлі авторлық дәрістер, панельдік сессиялар мен шеберлік сабақтары AlmaU университетінде өтеді. Кіру тегін.
