26 шілде мен 28 шілде аралығында Алматыда екінші рет халықаралық Almaty animation festival өтеді.
Бұл бірегей фестиваль көрермендерді әлемдік анимация индустриясының заманауи трендтерімен таныстырады және анимациялық өнердің алуан түрлі екенін тамашалауға мүмкіндік береді.
Биыл 52 елден 250-ден астам жоба келіп түсті, оның ішінен конкурс бағдарламасына 80 мультфильм іріктеуден өтті.
Фестивальде деректі фильмдер, эксперимент мультфильмдер және музыкаға арналған бейнелер бойынша бөлек байқаулар өтеді. Фестивальде Жапония, Германия, АҚШ, Нидерланды, Корея, Канада және басқа елдердің үздік анимациялық жобалары көрсетіледі. Қазақстаннан байқау бағдарламасына Ninety One бойзбенді үшін түсірілген анимациялық клип пен үш студенттік фильм өтті, — делінген хабарламада.
«Almaty Animation Festival-2024» байқау бағдарламасы түрлі номинация бойынша жеңімпаздарды анықтайды:
- Үздік халықаралық анимациялық фильм
- Студенттер арасындағы үздік анимациялық фильм
- Орталық Азияның үздік анимациялық фильмі
- Үздік эксперимент анимация
- Музыкаға арналған үздік анимациялық видеоклип
- Үздік анимациялық деректі фильм
Әрбір байқауды тәуелсіз және білікті қазылар алқасы бағалайды.
Сонымен қатар фестиваль өзін дамытамын деушілерге де қызық болмақ: қатысушыларды “Ara Studios” және “Taskyn” студияларынан шеберлік сабақтары және басқа да қызық шығармашылық кездесулер, пікірталастар мен танымал режиссерлердің лекциялары күтеді.
Айта кетейік, фестиваль ТМД-ға қатысушы мемлекеттердің Мемлекетаралық гуманитарлық ынтымақтастығы қорының қолдауымен өтеді.
