Алматыда қоғамдық көліктерде сараланған тариф енгізілуі мүмкін. Алайда «Оңай» картасы бар азаматтарға уайымдаудың қажеті жоқ, олар үшін жол ақысы сол баяғыша 80 теңге болып қала бермек. Ал қолма-қол ақша төлейтіндер үшін билет құны 120 теңгеге дейін өсуі мүмкін. Сондай-ақ, жаңа тариф бір реттік жол ақысын төлеп, бірнеше бағытқа тегін қатынайтындарға қатысты болмақ.
«Бізде қазір жолақы төлеудің 2-ақ түрі бар. 80 теңгеден карточка аласыз немесе сіз пенсионер, оқушы болсаңыз, жеңілдетілген 1 айлық жол жүру билетін аласыз. Енді қазір қоғамдық көлікті жиі қолданбайтын болсаңыз, 10-50 рет жол жүруге карточка аласыз, 1 жылдың ішінде 10-ақ рет жүрсеңіз, бұл карточка сізге 1 жылға жетеді. 1 айдан кейін күйіп кетпейді»,- деді Жолаушылар көлігі және автомобиль жолдары басқармасының басшысы Мақсұт ИСАХОВ.
Тағы бір өзгеріс – қоғамдық көлікке аз мінетіндер бірнеше рет жол жүру картасына қол жеткізе алады. Яғни, айына 5-6 рет автобусқа мінетін болсаңыз, соған сәйкес карта сатып аласыз.
Жаңа тарифтің нақ қашан енгізілетіні әзірге белгісіз. Құжат толық мақұлданғаннан кейін, өзгертулер мен толықтыруларды жергілікті мәслихат бекітетін болады.