Қазақстан мен Оңтүстік Корея елдері арасындағы әуе рейстерінің саны артып, жаңа әуе бағыттары ашылады. Бұл туралы азаматтық авиация комитетінің баспасөз қызметі хабарлады.
Сеулде (Корея Республикасы) Қазақстан Республикасы көлік вице-министрі Талғат Ластаевтың Корея Республикасы жер, инфрақұрылымы және көлік министрінің орынбасары Юн Санг Лимен екіжақты кездесуі өтті.
Кездесу барысында тараптар Астана мен Сеул арасындағы рейстерді қайта бастау, «Алматы-Сеул» бағыты бойынша орындалатын рейстерді ұлғайту, сонымен қатар Шымкенттен Сеулге және Пусан мен Қазақстан қалалары арасындағы рейстерді ашу мәселесін талқылап уағдаласты, — делінген хабарламада.
Сонымен қатар Талғат Ластаев T ‘ Way төмен бюджеттік әуе компаниясының және Sirius Airlines жүк әуе компаниясының басшылығымен кездесулер өткізді. Кездесу барысында кореялық тасымалдаушылар Қазақстанға ұшуға ниетті екенін білдірді.