Батыс Қазақстан облысының прокуратурасы Жәңгір хан атындағы аграрлық-техникалық университетінің ғылыми қызметкерлері қаражат жымқырды деген күдікпен сотқа дейінгі тергеуді бастады.
Бұл туралы бас прокуратураның ресми өкілі Дархан Дүйсембай мәлімдеді.
Оның айтуынша, ғылым және жоғарғы білім министрлігі аса қауіпті аурулардың таралуы тақырыбында ғылыми зерттеулер жүргізу үшін осы университетке 55 миллион теңге бөлген. Зерттеу нәтижелері халықаралық конференцияларда талқыланып, содан кейін патенттелуі керек еді.
Алайда университет ғылыми зерттеу жұмыстарын формальды жүргізген және патент алмаған. Бұған қарамастан атқарылған жұмыстар туралы жалған акті жасалып, бөлінген қаражат ұрланған, — делінген хабарламада.
Прокуратураның тапсырмасы бойынша қылмыстық істі экономикалық тергеп-тексеру департаменті тергеп жатыр.