Премьер-министр Әлихан Смайыловтың төрағалығымен өткен кеңесте «Алтын орда» базары жұмысының өзекті мәселелері қаралды.
Бұл туралы үкіметтің баспасөз қызметі хабарлады.
Базарда 5 мыңнан астам сауда орны бар, оған келушілер күніне шамамен 50 мың сатып алушыға жетеді.
Бас прокуратура және мемлекеттік органдармен тексеру нәтижесінде санитариялық, ветеринариялық, экологиялық, су, еңбек, сәулет-құрылыс, өртке қарсы, салықтық бақылау, сонымен қатар бәсекелестікті қорғау саласында 300-ден астам заңнама нормаларын бұзу жағдайын анықтады, — делінген хабарламада.
Кеңес қорытындысы бойынша премьер-министр қолданыстағы заңнамаға сәйкес түбегейлі шаралар қабылдау қажет екенін айтып өтті.
«Алтын орда» базарының қызметін ретке келтіру және бағаны қалыптастыруда ашықтықты қамтамасыз ету мақсатында қоғамдық бақылауды ұйымдастыру қажет, — деді Әлихан Смайылов.
Сонымен қатар барлық заңбұзушылықтар толығымен жойылғанға дейін уәкілетті мемлекеттік органдар қызметкерлерінен құралған тұрақты мобильдік топ құру тапсырылды.
«Алтын орда» базарының баға саясатына ықпалын азайтатын баламалы көтерме-сауда орталықтарын құру бойынша жұмыс жалғасады.
