Премьер-министр Әлихан Смайыловтың төрағалығымен өткен мемлекет басшысының сайлауалды бағдарламасын іске асыру жөніндегі республикалық штаб отырысында тұрғын үй-коммуналдық шаруашылық инфрақұрылымын кешенді жаңғырту мәселелері талқыланды.
Бұл туралы үкіметтің баспасөз қызметі хабарлады.
Ұлттық экономика министрі Әлібек Қуантыров президент тапсырмасы бойынша әзірленген «Тарифті инвестицияға айырбастау» бағдарламасын енгізу арқылы республика бойынша электр, жылу, сумен жабдықтау және су тарту желілерінің тозуын орта есеппен 20%-ке төмендету жоспарланып отырғанын баяндады.
Индустрия және инфрақұрылымдық даму министрі Марат Қарабаевтың айтуынша, әлеуметтік жағынан аз қамтылған азаматтардың коммуналдық қызметтерге шығындарын азайту үшін оларды мемлекет тарапынан көрсетілетін тұрғын үй көмегі аясында ішінара өтеу көзделген. Былтыр өтемақы мөлшері мен оны алуға үміткерлердің қатарын ұлғайтуды көздейтін өзгерістер енгізілді. 2023 жылдың 1-тоқсанының қорытындысы бойынша 17 мың отбасына 372 миллион теңгеден астам тұрғын үй көмегі көрсетілді.
Энергетика министрі Алмасадам Сәтқалиев Дүниежүзілік банк және KPMG халықаралық компаниясымен бірлесіп, республиканың 56 жылу электр станциясына техникалық аудит жүргізілгенін баяндады.
Өңірлерде жүріп жатқан ТКШ инфрақұрылымын жөндеу жұмыстары туралы Қостанай облысының әкімі Құмар Ақсақалов, Қарағанды облысының әкімі Ермағанбет Бөлекпаев, Ақмола облысының әкімі Ермек Маржықпаев баяндама жасады.
Премьер-министр мемлекет басшысы саладағы күрделі проблемаларды ескере отырып, елдің тіршілік көзіне қажетті барлық жүйені жаңғыртуға және күрделі жөндеуге бағытталған «Тарифті инвестицияға айырбастау» бағдарламасын іске асыруды тапсырғанын айтып өтті.
Ол үшін біз заңнамалық түзетулерді, нормативтік құқықтық актілерді қабылдадық. Бұған дейін табиғи монополиялар субъектілерінің инвестициялық бағдарламалары мен тарифтерін түзете алмай келген едік. Енді оған мүмкіндік туып отыр, — деді Әлихан Смайылов. Оған қоса үкімет басшысы коммуналдық кәсіпорындар тарифті түзету және жаңғырту процесін бастау үшін қажетті құжаттаманы баяу дайындап жатқанын айтып өтті.
Бұл процесті созбалаңға салуға болмайды. Желілер мен станцияларды күрделі жөндеу жұмыстарын жедел бастау маңызды. Бұл – кезек күттірмейтін міндет. Әсіресе, бұл – құрылыс маусымы қысқа және жылу беру кезеңі ерте басталатын солтүстік өңірлер үшін өзекті мәселе, — деді премьер-министр.
Үкімет басшысы қалыптасқан жағдайды ұлттық экономика министрлігі тарапынан кеткен олқылық деп айтып өтті.
Осыған байланысты Әлихан Смайылов ведомство басшысы Әлібек Қуантыровқа ескерту жасап, үйлестіру жұмыстарының төмен деңгейде жүргізілгені үшін табиғи монополияларды реттеу комитетінің төрағасы Асан Дарбаевқа сөгіс жариялады.
Коммуналдық қызметтердің сапасына қатысты президенттің және халықтың тарапынан орынды сын естіп келеміз. Алдымыздағы жылыту маусымында өткен қыста орын алған төтенше жағдайларға жол бермеу керек. Сұраныс қатаң болады, — деді Әлихан Смайылов.
Үкімет басшысы инфрақұрылымды жаңғырту мақсатында коммуналдық кәсіпорындардың тарифті түзету бойынша берген өтінімдерін жедел енгізуді, жөндеу жұмыстарын жүргізу үшін маусым айының соңына дейін жылу желілеріне техникалық тексеру жүргізуді аяқтауды, сонымен қатар 2024 жылға жоспарланған құрылыс-монтаж жұмыстары бойынша жобалау-сметалық құжаттаманы жыл соңына дейін әзірлеуді тапсырды.