Қасым-Жомарт Тоқаев БҰҰ бас хатшысының саяси мәселелер жөніндегі көмекшісі Мирослав Енчаны қабылдады. Бұл туралы Ақорда хабарлады.
Мемлекет басшысы жоғары лауазымды дипломатқа ілтипат білдіре отырып, Біріккен ұлттар ұйымымен көпжақты ынтымақтастықты дамыту тұрғысынан оның бұл сапары маңызды екенін айтып өтті.
Кездесуде Қазақстан мен БҰҰ арасындағы нақты іс-әрекеттердің маңызды бағыттары, соның ішінде Орталық Азия бойынша превентивті дипломатия жөніндегі өңірлік орталық аясындағы мәселелер талқыланды.
Алматыда Орталық Азия мен Ауғанстанның орнықты даму мақсаттары жөніндегі БҰҰ-ның өңірлік орталығын ашу перспективаларына ерекше назар аударылды.
Мирослав Енча Қазақстан мен БҰҰ арасындағы ынтымақтастық деңгейіне, сонымен қатар елімізде жүргізіліп жатқан саяси реформаларға жоғары баға берді.
Бұдан бөлек, олар өңірлік және халықаралық күн тәртібіндегі өзекті мәселелер жөнінде пікір алмасты.
Кездесу соңында Қасым-Жомарт Тоқаев БҰҰ бас хатшысы Антониу Гутерришке сәлемін жолдады.