Депозит иелеріне 10% сыйлықақы төлеу шарттары жарияланды

Бұл туралы КТК телеарнасы хабарлады.

Әңгіме ақшасын ұлттық валютада жинайтын азаматтар туралы. Бағдарлама 2022 жылдың 23 ақпанына дейін ашылған депозиттерге қатысты. 10% төлемдер бір рет қана аударылады, қазақстандықтар ақшасын 2023 жылдан бастап ала алады.

Банктер өтемақыны 23 ақпанда шоттарда болған жинақ сомасына қарай есептейді. Ең жоғары шек 20 миллион теңгеден аспауы керек. Ақшаны ішінара алған жағдайда пайыздар шоттағы қалған сома негізінде төленеді.

Төлем шарты — бұл салымды 2023 жылдың 23 ақпанына дейін сақтау, яғни бір жыл бойы салымшы қаражатты депозитте сақтауы керек. Бұл өтемақы туралы өтініште банк қандай да бір жеке мәліметті, банк шоттардың кез келген нөмірін, карталарды сұрауға құқығы жоқ. Егер салымшыға телефон соғып: «Өтініш беру үшін картаның нөмірін айт» десе, бұлар сөзсіз алаяқтар. Оларға ешқандай мәлімет беруге болмайды, — деді Қазақстандық депозиттерге кепілдік беру қорының төрағасы Әділ Өтембаев.