Облыстың дамуы мен халық санының қарқынды өсуіне орай өңірде суға деген сұраныс артып келеді. Бүгінде облыс 154 мың текше метр су тұтынады. Жаз мезгілінде мамыр айынан қыркүйеек дейін 51 мың текше метр су жетіспейді. Ал, 2025 жылға қарай тұтыну 250-260 мың текше метрге жетеді деген болжам бар, — деді Нұрлан Ноғаев Орталық коммуникациялар қызметінде өткен брифингіде.
Әкімнің айтуынша, су тапшылығын жою жөнінде облыста 9 жоба іске асып жатыр.
Оның екеуі келесі жылдың бірінші жартыжылдығында басталады. Біріншісі – Ақтауда «Каспий» су тұшыту зауытының қуатын 20 мыңнан 40 мың текше метрге дейін жеткізу. Екіншісі – Қаражанбас кен орнында тәулігіне 17 мың текше метр су тұшытатын зауыт биыл іске қосылады. Сонда 51 мың текше метрдің 31 мыңы қамтамасыз етіледі. Сайтта көрсетілгендей, 9 жоба жүйелі түрде жүзеге асырылуда. Мәселен, «ҚазМұнайГаз» компаниясы Кендірлі ауылында тәулігіне 50 мың текше метр су тұшыту зауытын салып жатыр, — деді Нұрлан Ноғаев.
Спикер мемлекет басшысының өңірдегі ауыз су тапшылығын шешу үшін нақты тапсырмаларды жүктегенін еске салды.
Біз белсенді жұмысты бастадық, инвесторлармен келіссөздер жүргізудеміз, басқа елдердің тәжірибесін зерделеудеміз. Қазір Маңғыстау облысында ауыз су тапшылығы мәселесін шешу біздің басты міндетіміз болып отыр. Ақтау, Жаңаөзен және Форт-Шевченкода ауыз сумен қамтамасыз ету 100% жасақталған. Қазіргі уақытта ауылдық елдімекендерді қамту өткен жылы 92% болса, биылғы жылдың қорытындысы бойынша 96,2% болады. Облыста барлығы 59 ауылдық елдімекен бар, соның 47-сі ауыз сумен қамтылған. 12 ауылды президент 2022 жылға дейін орталықтандырылған сумен қамтамасыз етуді тапсырды. Биыл орталықтандырылған сумен 2 ауыл қамтылады: Бекі және Басқұдық. Нәтижесінде елді мекендерді орталықтандырылған ауыз сумен қамтамасыз ету 96%-ға жетеді. Қалған 10 ауылды ауыз сумен қамтуды 2022 жылдың соңына дейін аяқтау жоспарланып отыр, — деді Нұрлан Ноғаев.
