Оқу орнының жаңа басшысын ұжымға Білім және ғылым министрі Асхат Аймағамбетов таныстырды деп хабарлайды Tengrinews.kz тілшісі министріктің баспасөз және қоғаммен байланыс бөліміне сілтеме жасап.
Гүлмира Әмірханқызы Қанай 1986 жылғы 12 қаңтарда Жамбыл облысында дүниеге келген.
2007 жылы Абылай хан атындағы Қазақ халықаралық қатынастар және әлем тілдері университетінің бакалавриатын «Лингвист: ағылшын тілі мұғалімі» мамандығы бойынша үздік бағамен тәмамдаған.
2009 жылы осы жоғары оқу орнының магистратурасын «Аударма ісі» мамандығы бойынша үздік бағамен бітірген.
Гүлмира Қанай — Халықаралық «Болашақ» бағдарламасының түлегі. 2011 жылы Ұлыбританияның Уорвик университетінің магистратурасын «Білім беру саласындағы басқару» мамандығы бойынша, 2019 жылы Кембридж Университеті Білім беру факультетінің докторантурасын үздік тәмамдаған.
Ғылыми дәрежесі — PhD. Еңбек жолын 2007 жылы Абылай хан атындағы Қазақ халықаралық қатынастар және әлем тілдері университетінің оқытушысы қызметінен бастаған.
2011-2012 жылдары аралығында Назарбаев Университеті Халықаралық ынтымақтастық департаментінің консультанты;
2012-2014 жылдары аралығында Назарбаев Университеті Халықаралық ынтымақтастық департаментінің менеджері;
2014-2020 жылдары аралығында Назарбаев Университеті Оқуға қабылдау департаментінің аға менеджері қызметтерін атқарған.
2020 жылдың қаңтар айынан бері осы уақытқа дейін Назарбаев Университеті Жоғары білім беру мектебінің Постдокторанты.
Гүлмира Әмірханқызының докторлық диссертациясы «Қазақстан мектептеріндегі мұғалімдер көшбасшылығын дамыту» тақырыбын зерттеуге арналған.
Бүгінде ол «Қазақстандық мұғалімдердің көшбасшылығы» зерттеу жобасының жетекшісі.
Ғылыми зерттеу жұмысының нәтижелері бірнеше халықаралық және отандық ғылыми басылымдарда жарияланған.
Зерттеу бағыттары:
— Білім беру саласындағы көшбасшылық пен менеджмент;
— Мұғалімдердің көшбасшылығын дамыту;
— Педагогикалық білім беру;
— Оқытуды ұйымдастыру.
Гүлмира Әмірханқызы Қанай Білім беру саласындағы Қазақстан зерттеушілері қауымдастығының (KERA), Білім беру саласындағы АҚШ зерттеушілері қауымдастығының (AERA) мүшесі.
Ведомство басшысы Гүлмира Әмірханқызына 80 жылға жуық тарихы университетті дамыту жолындағы жұмысына сәттілік тіледі.
Ел Президенті жастарды мемлекетті басқару ісіне тартуға көп көңіл бөледі. Біз Мемлекет басшысының саясатын, соның ішінде білім беру жүйесіне жаңа көшбасшыларды тарту бойынша жұмысты жалғастырып келеміз. Жаңа көшбасшылар — өз елін, жерін сүйетін патриоттардан құралған жас ұрпақ. Көбінің халықаралық тәжірибесі бар, олар — кәсіби ортада кеңінен танымал және маман ретінде қалыптасқан тұлғалар. Тек соңғы бірнеше айда еліміздегі жетекші жоғары оқу орындарының басшылары болып әлеуеті зор, тәжірибесі мол көшбасшылар тағайындалды. Соның бірі — Гүлмира Әмірханқызы. Жас көшбасшылар өз білімі мен тәжірибесін еліміздің гүлденуі жолында пайдаланып, үлесін қосады деп ойлаймыз. Олардың әрқайсына үлкен үміт артылып отыр, — деді Асхат Аймағамбетов.
