Бұл туралы Tengrinews.kz тілшісі Индустрия және инфрақұрылымдық даму министрінің орынбасары Берік Камалиевке сілтеме жасап хабарлады.
Ведомствоаралық комиссияның шешімімен біз 1 наурыздан бастап Нұр-Сұлтан — Сеул, Алматы — Сеул бағыттары бойынша тұрақты рейс санын аптасына тоғыздан үшеуге дейін қысқарттық. Бұл — біздің Air Astana және Оңтүстік Кореяның Asiana Airlines әуе компанияларының рейстері. Ведомствоаралық комиссия 8 наурыздан бастап бізде Оңтүстік Корея мен коронавирус қаупі бойынша бірінші санатқа жататын елдер азаматтарының кіруін тоқтатуға шешім қабылдады, — деді Берік Камалиев.
Вице-министрдің айтуынша, ведомство әуе компанияларына Сеул — Алматы және Сеул — Нұр-Сұлтан бағыттары бойынша Қазақстан азаматтарына ғана қатынауға рұқсат берілетінін ескерткен.
Бізде басқа елдерден басқа әуе компанияларымен келетін транзит жолаушылар да бар. Біз басқа әуе компанияларына 8 наурыздан бастап Қазақстанға бірінші санаттағы елдер азаматтарына кіруге тыйым салынатынын хабарладық, — деді Берік Камалиев.
Айта кету керек, коронавирус инфекциясының таралу қаупі бойынша бірінші санаттағы елдер қатарына Қытай, Иран, Оңтүстік Корея, Италия және Жапония кіреді.