Димаш Құдайберген Ресейдің «Виктория» ұлттық музыка сыйлығын екі бірдей номинация бойынша жеңіп алды. Бұл туралы Dimashnews.com сайты хабарлады.
Ол «Классикалық музыкадағы жыл вокалисі» номинациясы бойынша жүлдені Olimpico әнімен ұтып алды. Димаш Құдайбергенмен бірге бұл номинация бойынша опера әншілері Ильдар Абдразаков, Аида Гарифуллина, Хибла Герзмава, Анна Нетребко және Ольга Перетятьколар сынға түсті.
Сонымен бірге Димаш Құдайберген «Открытие года» номинациясы бойынша да жеңімпаз атанды. Dimashnews.com сайтының хабарлауынша, жеңімпазды Ресей Федерациясының Ұлттық музыканы қолдау қорының сарапшылары анықтайды. Бұл марапат 2015 жылы Юлианна Караулова мен Егор Кридке берілсе, 2016 жылы оны Ростислав Мудрицкий алған.
Айта кетейік, әр жыл сайын «Виктория» сыйлығы аясында үздік музыканттар, орындаушылар, композиторлар, ақындар, продюсерлер, музыка сыншылары мен журналистер марапатталады.
