Мемлекет басшысы Қасым-Жомарт Тоқаев Euronews-ке берген сұхбатында Қазақстанда тұрғындарға шеруге шығуға рұқсат беретін заң қабылданатынын айтты. Президенттің айтуынша, қоғам қауіпсіздігіне «шығын келтірмеген» шеру қатысушылары мерзімінен бұрын босатылады. Ол митингіге шыққан жастардың қоғамнан орнын табуын алдағы мақсаты ретінде қойғанын айтты.
Саяси мақсатым — жастарды билікке тарту, мемлекеттік маңызды мәселелерді шешуге көмектесу. Шеру жасаған қозғалыстардың өкілдерін келіссөз жүргізуге дөңгелек үстелге шақырамыз, мәселелер көшеде тәртіпсіздік пен аласапыран атмосферада емес, осылай шешіледі, — деді Қасым-Жомарт Тоқаев.
Сондай-ақ ол Қазақстанда рұқсат берілген митингілерге шығуға мүмкіндік жасайтын заң қабылданатынын айтты.
Әрине, заңсыз болғанның бәрі тоқтатылады. Бас прокуратура көшедегі осындай митингілердің заңсыз екенін бірнеше рет ескертті. Себебі олар оған қатысқысы келмейтін халыққа кедергі жасайды. Сондықтан жаңа заң қабылданады, енді демонстрацияға шығып, пікірін білдіргісі келген халық тиісті органға жүгінеді, оларға пікірін білдіру үшін арнайы жер беріледі, — деді Қасым-Жомарт Тоқаев.
Мемлекет басшысы ЕҚЫҰ-ның соңғы президенттік сайлау жайлы баяндамасында айтылған сынға да қатысты пікірін білдірді.
Ашық сайлау өткізу үшін барлық жағдай жасалды. Кей учаскеде заңбұзушылықтар болуы мүмкін. Әрине, толыққанды сараптама жасаймыз. Егер заң бұзылғаны анықталса, қажет шаралар қолданылады, — деді Президент.
