Димаш Құдайберген шоудың екінші кезеңінде америкалық музыкант Эрик Карменнің All by Myself әнін орындады. Димаш қарсыласы итальян әнші Кристина Скуччианы 94-39 есебімен жеңіп, үшінші кезеңге жолдама алды.
Ал Данэлия Төлешова The World’s Вest екінші кезеңінде Stone Cold әнін орындады. Данэлия бұл әнді Украинадағы таланттар шоуында орындап, жеңіске жеткен еді. Данэлияның қарсыласы Жапониядан келген скрипкашы Манами Ито болды. Қазылар алқасының бағалауы бойынша Данэлия 71-60 есебімен үшінші кезеңге өтті. Жапон скрипкашы Манами Итоның оң қолының жоқ екенін еске сала кетейік. Ол байқауда жасанды қолмен өнер көрсетіп жүрген.
Мен кішкентай супержұлдыздың дүниеге келгеніне куә болдым деп ойлаймын, — деді қазылар алқасының мүшесі Ру Пол Данэлияның орындауынан кейін.
Ру Пол Димаш Құдайбергенге ең жоғары ұпай — 50 балл берді.
Еске сала кетейік, Димаш Құдайберген мен Данэлия Төлешова CBS телеарнасының The World’s Вest шоуына қатысып жатыр.
The World’s Вest – CBS телеарнасындағы талантты адамдар туралы бағдарлама. Шоудың қазылар алқасының құрамында актриса Дрю Бэрримор, әнші Фэйт Хилл, актер Ру Пол және ағылшын комигі Джеймс Корден бар. Қатысушылардың өнерін үш негізгі төреші мен әлемнің түрлі еліндегі 50 сарапшы бағалайды.