Мемлекеттік наградаларға ұсынылатын кандидаттар анықталды

Мемлекеттік наградалар жөніндегі комиссияның отырысында мемлекеттік және қоғамдық ұйымдардың ұсыныстары қаралды.

Мемлекеттік награда
Фото: Mod.gov.kz

ҚР Мемлекеттік хатшысы Гүлшара Әбдіқалықованың төрағалығымен Президент жанындағы Мемлекеттік наградалар жөніндегі комиссияның отырысы өтті.

Ақорданың баспасөз қызметінің хабарлауынша, отырыста мемлекеттік органдардың, ұйымдар мен қоғамдық бірлестіктердің мемлекеттік наградалармен марапаттау жөніндегі ұсыныстары қаралды.

Қазақстан Республикасы Президентінің жанындағы консультативтік-кеңесші орган саналатын комиссия Қазақстан Республикасының мемлекеттік наградаларын белгілеу және жою, награда мәселелері жөніндегі заңдардың жобаларын және басқа да нормативтік құқықтық актілерді, Қазақстан Республикасының мемлекеттік наградаларымен марапаттау туралы ұсыныстарды қарастырады.

Комиссия мүшелері отырыс қорытындысы бойынша марапаттау үшін Мемлекет басшысына ұсынылатын кандидаттарды анықтады. Мемлекеттік наградалар дәстүр бойынша Тәуелсіздік күні қарсаңында тапсырылады.