Нұрсұлтан Назарбаев «Қазатомөнеркәсіп» басшысын қабылдады

Мемлекет басшысы «Қазатомөнеркәсіп» ұлттық атом компаниясы» акционерлік қоғамының басқарма төрағасы Ғалымжан Пірматовты қабылдады.

Нұрсұлтан Назарбаев Қазақстандағы ірі ұлттық компаниялардың бірі саналатын «Қазатомөнеркәсіп» компаниясы әлемдік атом өнеркәсібі саласында маңызды орын алатынын атап өтті.

«Қазатомөнеркәсіп» ұлттық атом компаниясы» акционерлік қоғамы басқармасының төрағасы Президентке компания жұмысының негізгі қорытындылары мен перспективалары жөнінде баяндады.

Біз әлемдік атом саласындағы жағдайды мұқият саралап, дамудың жаңа стратегиясын қабылдадық. 2017 жылы және биылғы 8 айда компания өндірістік және қаржылық жоспарларының бәрін орындады. Осы жылы төленетін дивиденттер былтырмен салыстырғанда 2 есе артады деп болжап отырмыз, – деді Ғалымжан Пірматов.

«Қазатомөнеркәсіп» компаниясы басшысының мәліметіне сәйкес биыл уран сату көлемі соңғы үш жылдағы орташа көрсеткіштен жоғары болмақ. Нәтижесінде компания әлемдік нарықта өндіріс ауқымы жағынан ғана емес, сонымен бірге сату көлемі жөнінен де ірі кәсіпорынға айналады.

Кездесу соңында Нұрсұлтан Назарбаев Ғалымжан Пірматовқа бірқатар нақты тапсырма берді.