Не болды?
Келесі жылдан бастап докторантураға түсетіндерге қойылатын талаптар өзгерді. Кейбір мамандықтар үшін ағылшын тілін меңгеру міндетті болмайды. Бұл туралы мәжіліс депутаты Асхат Аймағамбетов мәлімдеп отыр.
Мәлімет
Ол депутаттық сауалда докторантураға түсушілерге қойылатын талаптарды қайта қарау мәселесін көтерген. Депутаттың сөзіне қарағанда, қазақ филологиясы немесе музыка саласында талантты зерттеушілер көп. Олардың ішінде тек шет тілі сертификатының жоқтығынан докторантураға түсе алмай жүргендер бар екен.
GPT мен Gemini сияқты құралдар шыққанға дейін бұл талаптар орынды болса, қазір жағдай өзгерді. Білім және ғылым министрлігі ұсынысымды қолдады, — дейді Асхат Аймағамбетов.
Енді мына білім беру бағдарламаларының топтары бойынша оқуға түсу үшін шет тілін меңгергенін растайтын сертификат талап етілмейді:
- D005 – Дене шынықтыру педагогтерін даярлау;
- D006 – Музыка педагогтерін даярлау;
- D017 – Қазақ тілі мен әдебиетінің педагогтерін даярлау;
- D018 – Орыс тілі мен әдебиетінің педагогтерін даярлау.
Эссенің орнына зерттеу жоспарын жазады
Асхат Аймағамбетов үміткердің ғылыми әлеуетін бағалау үшін оқуға түсу кезінде эссе жазудың орнына Research Proposal (зерттеу жоспарын) дайындауды енгізуді де ұсынған. Министрлік бұл ұсынысты да қабылдады. Research Proposal енгізуді және тәуелсіз сарапшыларды тартуды 2026-2027 оқу жылынан бастайды деп жоспарланып отыр.
Мәселені жедел шешіп бергені үшін министрлікке алғыс айтамын. Дегенмен, Scopus бойынша талаптарды өзгерту, тізімді басқа да шығармашылық бағыттарға кеңейту, тіл емтиханын тапсыру мерзімін оқу соңына ауыстыру (талапты мүлдем алып тастамай) және іріктеу процесінде академиялық адалдықты күшейту сияқты жүйелі ұсыныстарым әзірге жүзеге аспады. Докторантураға қабылдау талаптары мен бағдарламаларды жетілдіру бойынша шараларды әрі қарай қарастыру маңызды, — дейді Асхат Аймағамбетов.
Контекст
Естеріңізге салайық, енді докторантураға түсушілер қазақ тілін меңгергенін растауы керек.
