Қазақстан қажылық миссиясы Меккеге кеткен отандастарымыздың дін аман екенін хабарлады.
Қажылық миссиясының құрамында төрт дәрігер және 16 туроператордың әрқайсындағы бір дәрігер ем-шарамен айналысып жатыр.
Айта кетейік, Меккедегі аптап ыстықтан 550 адам қаза болды. Қазақстан қажыларының арасында қайтыс болған ешкім жоқ.
Миссиядағы дәрігерлер тобының жетекшісі Ардақ Айтбайұлының айтуынша, медициналық орталық көмегіне 14-16 маусым күндері 703 қажы жүгінген. Олардың қатарында жүрек-қан тамырлары, жоғары және төмен тыныс және асқазан-ішек аурулары, сонымен қатар басқа да (мазоль жарақаты, аллергия, конъюнктивит, тағы басқа) сырқат бойынша 120 қажы бірнеше рет тексерілген.
15 маусымда Мұздалифада қан қысымы көтерілген қажыға жедел алғашқы көмек көрсетіліп, дәрігердің бақылауымен қонақүйге жөнелтілді. 16 маусымда Мина жазығында транзиторлық ишемиялық ұстама бойынша бір қажыға алғашқы медициналық көмек көрсетіліп, стационарға жатқызылды. Жамаратта шайтанға тас лақтырып келе жатқан жолда қанты төмендеп, есінен танып жатқан әйел адамға тез арада көмек көрсетіліп, ол да стационарға жеткізілді, — деді Ардақ Айтбайұлы.
Қазіргі таңда аталған науқастар дәрігерлердің толық бақылауында, жағдайы бірқалыпты. Одан бөлек, елден жеткізілген дәрі-дәрмек қоры да жеткілікті.
