Республикалық және негізгі облыстық жолдарда сапалы ұялы байланыс пен мобайл интернет болуға тиіс. Бұл туралы премьер-министр Олжас Бектенов айтты.
Жылдам интернет цифрландырудың негізі саналады. Осы ретте сапалы байланыспен қамтамасыз ету мәселесі – стратегиялық маңызы бар міндет. Оны шешу үшін өткен жылы «Қолжетімді интернет» ұлттық жобасы қабылданды. Енді осыны уақтылы іске асыру – цифрлық даму министрлігінің міндеті. Барлық іс-шараны орындау нәтижесінде 2027 жылға қарай елді мекендер мен жолдарды байланыс желілерімен қамту 100%-ке жетеді. Осы орайда тұрғындар жылдам, 100 Мбит/секундтан кем болмайтын интернетпен қамтамасыз етілуі керек, — деді үкімет басшысы.
Премьер-министр республикалық және негізгі облыстық жолдарда сапалы ұялы байланыс пен мобайл интернет болуға тиіс екенін баса айтты.
Байланыстың бұл түрі адамдардың сөйлесу немесе ақпарат алу мүмкіндігі ғана емес. Ол сонымен қатар жаңа сервистер, мемлекеттік және қаржылық қызметтер ұсыну, жаңа бизнес түрлерінің қалыптасуы екенін айта кеткен жөн. Сондықтан байланыс қызметтерінің көлемін арттыру экономикалық өсудің маңызды аспектілерінің бірі екені белгілі. Егер көрсетілетін қызметтер мен сервистерге онлайн әрі жылдам қол жеткізу болмаса, технологиялық жағынан ең озық жобалардың өзінен мемлекет қажетті әсер ала алмайды, — деді Олжас Бектенов.
