10 қарашадан бастап Қазақстан мен Қытай арасында визасыз режим қолданылады. Осыған байланысты Қазақстаннан Қытайға баратын рейстер көбейеді.
Бұл туралы көлік министрлігінің баспасөз қызметі хабарлады.
Көлік министрлігі мемлекет басшысының елдің көлік-логистикалық әлеуетін дамыту жөніндегі тапсырмасын орындау шеңберінде әуекомпаниялармен бірлесіп әуе тасымалдарына өсіп келе жатқан сұранысты қанағаттандыру мақсатында елдер арасындағы рейстер санын ұлғайту бойынша жұмыс істеп жатыр.
Осылайша, Air Astana әуекомпаниясы 2023-2024 жылдары күзгі-қысқы маусымда жолаушылар ағынының өсуіне қарай мына бағыттар бойынша рейстерді ұлғайтуды жоспарлап отыр:
- Алматы-Пекин: аптасына 6-дан 7 рейске дейін;
- Астана-Пекин: аптасына 1-ден 3 рейске дейін;
- Алматы-Үрімші: аптасына 2-ден 7 рейске дейін.
Сонымен қатар келесі жылы Air Astana әуекомпаниясы Қытайдың Шанхай, Гуанчжоу және Чэнду қалаларына жаңа бағыттар ашуды жоспарлап отыр. Бұдан басқа, қытайлық «Air Logistics» жүк әуекомпаниясы биылғы қараша айынан бастап Алматы–Сиань бағыты бойынша тұрақты жүк рейстерін іске қосуды жоспарлап отыр, — делінген хабарламада.
Сонымен қатар қазір Қазақстан мен Қытай арасында аптасына 27 рейс тұрақты орындалып жүр:
- Алматы-Пекин:» Эйр Астана » — аптасына 6 рейс:
- Астана-Пекин: «Эйр Астана» — 1 рейс;
- Астана – Үрімші: «Fly Arystan» — 2 рейс, «China Southern Airlines» — 2рейс;
- Алматы – Үрімші: «Эйр Астана» — 2 рейс, «China Southern Airlines» — 7 рейс;
- Алматы – Сиань: «China Southern Airlines» — 2 рейс;
- Астана – Сиань – Пекин: «Air China» — 2 рейс;
- Алматы-Ханчжоу: «Loong Airlines» — 3 рейс.
Қазақстан мен Қытайдың авиациялық билігі арасындағы қолданыстағы уағдаластықтарға сәйкес екі елдің әуекомпанияларына аптасына 84 рейсті орындауға рұқсат етілді.
