Оқушылардың қауіпсіздігін сақтау мақсатында ел мектептерінде рұқсаты бар күзетпен қамту шаралары қолға алынып жатыр. Бұл туралы оқу-ағарту министрі Ғани Бейсембаев мәлімдеді.
Білім беру ұйымдарында балалардың қауіпсіздігін қамтамасыз ету мәселесі бойынша келесі жұмыстар жүргізілді. Алдымен мектептерді ішкі істер органдарының жедел басқару орталықтарына қосу. Ұлттық білім беру деректер базасы бойынша бұл көрсеткіш 12 тамызда 83% болды. Егер жыл басында 1 673 мектеп қосылған болса, қазір бұл көрсеткіш 3 103 мектепке артып отыр. Алайда Алматы, Атырау және Қарағанды облыстарының әкімдіктері бұл жұмысты баяу жүргізіп жатыр. Сондықтан аталған өңірлер өзіңіздің тапсырмаңызға сәйкес жедел басқару орталықтарына қосылу бойынша жұмысты 25 тамызға дейін аяқтауы қажет, — деді Ғани Бейсембаев үкімет отырысында.
Сонымен қатар министр мектептердегі күзет мәселесін қозғады.
Лицензияланған күзет агенттіктерімен жасалған келісімшарттар негізінде жұмыс жүріп жатыр. Қазір бұл бағытта жұмыстың 84%-і бітті. Дегенмен Түркістан және Алматы облыстарының бұл бағыттағы жұмысы баяу екенін атап өткім келеді. Сонымен қатар дабыл түймелерін мектептердің 89%-і орнатты. Егер жыл басында дабыл түймелері бар 1 789 мектеп болса, бүгінгі күні 1,9 есе (3 327 мектеп) өскен, — деді Ғани Бейсембаев.
Оның айтуынша, Түркістан облысы, Ақтөбе және БҚО әкімдіктері аталған мәселені жүйелі түрде қатаң бақылауда ұстауы қажет.
