Парламент сенаты «Қазақстан Республикасының кейбір заңнамалық актілеріне жол жүрісін ұйымдастыру мәселелері бойынша өзгерістер мен толықтырулар енгізу туралы» заңды мақұлдады.
Заң мәжіліс депутаттарының бастамасымен әзірленген. Негізгі мақсаты – қолданыстағы құқықтық олқылықтарды жою және шағын электр көліктерін, сонымен қатар электросамокаттарын пайдалану мәселелерін заңнамалық реттеу.
Сенатор Евгений Больгерттің айтуынша, заң бойынша «электросамокат» ұғымы енгізіледі.
Ол ең жоғары конструктивтік жылдамдығы сағатына 25 километрден аспайтын көлік құралы деп танылады және олардың қозғалысы үшін орындар айқындалады. Сонымен бірге самокат жүргізушілері үшін бірқатар тыйым енгізіледі. Атап айтқанда, заңмен енгізілген шарттар мен тыйымдарды сақтай отырып, электросамокаттарға жолдың жүріс бөлігінің оң жақ шеті бойынша жүруге жол беріледі, — деді сенат депутаты.
Самокат жүргізушісі 18 жасқа толған болуы шарт, сонымен қатар кез келген санаттағы көлікті басқару құқығын беретін жүргізуші куәлігі, түймеленген дулыға, ал тәуліктің қараңғы уақытында үстінде жарық шағылыстыратын зат болуға тиіс.
Электросамокатқа тротуар немесе жаяу жүргіншілер жолымен сағатына алты километрден аспайтын жылдамдықпен жүруге рұқсат етіледі.
Заңда шағын электр көлігі мен электросамокат жүргізушілерінің құқықтары мен міндеттері белгіленген.
Бұдан бөлек, басқа құзыретті органда тіркелген көліктердің «Жол қозғалысы туралы» заңда көзделген талаптарға сәйкестігін тексеру үшін ішкі істер органдары қызметкерлерінің көліктерді тоқтатуының негіздерін белгілейтін түзетулер енгізілді.
Көліктерді мемлекеттік тіркеу туралы куәліктерді, жүргізуші куәліктерін және мемлекеттік тіркеу нөмірлік белгілерін дайындау саласында мемлекеттік монополия енгізілмек. Бұл қызмет түрлерін жүзеге асыру құқығы ҚР ішкі істер министрлігі жанындағы шаруашылық жүргізу құқығындағы республикалық мемлекеттік кәсіпорынына беріледі.
«Рұқсаттар және хабарламалар туралы» заңы көлік жүргізушілерін даярлау жөніндегі оқу ұйымдарының қызметін бастау немесе тоқтату туралы хабарламаның жаңа түрімен толықтырылады.
Мәжіліс қабылдаған заң жеке жүріп-тұру құралдарын пайдалану тәртібін құқықтық реттеу саласындағы алғашқы қадам. Сонымен қатар енгізілетін құқықтық новеллаларды тәжірибеде сынақтан өткізуді, сонымен бірге электросамокаттар мен шағын электр көліктерін пайдалану тәртібін реттеудің халықаралық тәжірибесін ескере отырып, болашақта өзінің заңнамалық шешімін талап ететін бірқатар мәселе бар, — деді Евгений Больгерт.
Сенат мәжіліс қабылдаған заңды мақұлдап, президенттің қол қоюына жіберді.